Россия яқин ойлар ичида Минскга «Искандар-М» ракета комплексларини етказиб беради. Бу ҳақда мамлакат президенти Владимир Путин беларуслик ҳамкасби Александр Лукашенко билан суҳбатда маълум қилган.
«Аввал келишиб олганимиздек, бу масала кун тартибида турганди ва қарор қабул қилинган. Биз яқин ойларда Беларусга «Искандар-М» ракета-тактик комплексларини тақдим қиламиз, улардан ҳам баллистик, ҳам қанотли ракеталар сифатида фойдаланиш мумкин, ҳам оддий қурол, ҳам ядро қуроли ташувчисига айлантириш имкони мавжуд», — деган Россия президенти.
«Искандар» — Россия оператив-тактик ракеталар комплекси, уни машинасозлик конструктор бюроси ишлаб чиққан. Мазкур комплекслар 500 километргача масофада ҳаводан ҳимоя тизимини йўқ қилишда, душман ракетасига қарши ҳимоя учун мўлжалланган.
Шунингдек, Лукашенко Путиндан Беларусь ихтиёридаги Су-25 самомётларининг ядро жанговар бирликлари билан бойитишни сўраган ва Путин уларни такомиллаштириш ишларида кўмак беришни ваъда қилган.
Россия президенти Европа мамлакатларида 200 ядро тактик қуроллари сақланаётгани, улардан фойдаланиш учун эса 257 та самолёт тайёр қилиб қўйилганини баён этди.
«Сиз уларга муқобил жавоб бериш имконияти бўлиши кераклиги ҳақида гапирдингиз, лекин биз уларга жавоб қайтаришимиз шарт эмас. Бунга зарурат йўқ. Аммо хавфсизликни таъминлашимиз зарур ва бу борадаги фикрингизга қўшиламан, иттифоқчи мамлакат, КХШТ (ОДКБ)га аъзо давлатлар хавфсизлигини таъминлашимиз лозим», — дея таъкидлаган Путин.
Лукашенко ўтган йили ноябрь ойида Россиядан бир қатор оператив-тактик ракета комплексларини олмоқчи эканлиги ҳақида гапирганди. 2022 йил майда Беларусь давлат раҳбари «Искандар» ва C-400 ракета комплекслари сотиб олинишини маълум қилди.
«Путин билан бу борада келишиб олдик. Етарлича «Искандар», C-400 ракета комплескаларини харид қилдик, армиямизни қуроллантирдик. Айни вақтда ихтиёримизда бутунлай бошқача кучга эга қўшин бор. Қурол-яроғлар рақибга жуда катта зарар келтира олади», — деганди ўшанда Лукашенко.
Февраль бошида Россия мудофаа вазирлиги C-400 ракета комплекслари Брест вилоятидаги полигонда иттифоқчи мамлакат кучини текшириш юзасидан машғулотларда ишлатилганини хабар қилган. «Ўзаро иттифоқ ечими - 2022» ўқув машғулотлари 10 февралда бошланган ва ўн кун давом этган. НАТО Россия ҳамда Беларуснинг қўшма машғулотлари Украинага қарши уруш учун тайёргарлик эканини тахмин қилган. Шундан кейин Москва бир неча бор Украинага ҳужум қилиш режаси йўқлигини қайд этган, аммо якунда февраль охирида икки давлат ўртасида уруш бошланди.
Изоҳ (0)