G7 davlatlari Rossiyadan oltin importini taqiqlashga kelishib oldi

Britaniya hukumati va AQSH prezidenti Jo Baydenning bayonotiga ko‘ra, G7 davlatlari Rossiyadan oltin importini taqiqlashga kelishib oldi.

Britaniya hukumati xabarida aytilishicha, Rossiya oltinini Buyuk Britaniya, AQSH, Yaponiya va Kanadaga olib kirishga ruxsat berilmaydi. Bayonotda guruhning yana uchta davlati – Fransiya, Germaniya va Italiya, shuningdek, butun Yevropa Ittifoqi tilga olinmagan.

Baydenning aytishicha, G7 davlatlari “birgalikda” Rossiyadan oltin importini taqiqlash haqida e’lon qiladi. Bu Rossiya Federatsiyasining “o‘nlab milliard dollar” olib keladigan eksportiga muhim ta’sir bo‘ladi.

Britaniya hukumati 2021-yilda oltin eksporti Rossiyaga 12,6 milliard funt sterling keltirganini ma’lum qildi. “So‘nggi oylarda oligarxlar o‘zlarini G‘arb sanksiyalarining moliyaviy ta’siridan himoya qilish maqsadida oltin quymalarini sotib olishga shoshilgani sababli uning Rossiya elitasi uchun qiymati oshdi”, — deyiladi hisobotda.

Rossiya rasmiylari bu qarorga hozircha izoh bermagan.

Reuters xabariga ko‘ra, Germaniyada bo‘lib o‘tayotgan “Katta yettilik” sammitida Rossiya neftining maksimal narxini belgilash, Rossiya o‘rnini bosadigan neft va gaz manbalarini topish ham muhokama qilinmoqda.