G7 давлатлари Россиядан олтин импортини тақиқлашга келишиб олди

Британия ҳукумати ва АҚШ президенти Жо Байденнинг баёнотига кўра, G7 давлатлари Россиядан олтин импортини тақиқлашга келишиб олди.

Британия ҳукумати хабарида айтилишича, Россия олтинини Буюк Британия, АҚШ, Япония ва Канадага олиб киришга рухсат берилмайди. Баёнотда гуруҳнинг яна учта давлати – Франция, Германия ва Италия, шунингдек, бутун Европа Иттифоқи тилга олинмаган.

Байденнинг айтишича, G7 давлатлари «биргаликда» Россиядан олтин импортини тақиқлаш ҳақида эълон қилади. Бу Россия Федерациясининг «ўнлаб миллиард доллар» олиб келадиган экспортига муҳим таъсир бўлади.

Британия ҳукумати 2021 йилда олтин экспорти Россияга 12,6 миллиард фунт стерлинг келтирганини маълум қилди. «Сўнгги ойларда олигархлар ўзларини Ғарб санкцияларининг молиявий таъсиридан ҳимоя қилиш мақсадида олтин қуймаларини сотиб олишга шошилгани сабабли унинг Россия элитаси учун қиймати ошди», — дейилади ҳисоботда.

Россия расмийлари бу қарорга ҳозирча изоҳ бермаган.

Reuters хабарига кўра, Германияда бўлиб ўтаётган «Катта еттилик» саммитида Россия нефтининг максимал нархини белгилаш, Россия ўрнини босадиган нефть ва газ манбаларини топиш ҳам муҳокама қилинмоқда.