Молдова ҳукумати Россия томонидан эҳтимолий ҳужум ҳақида маълумотга эга эмас. Бу ҳақда республика президенти Майя Санду Prime телеканали эфирида айтиб ўтди, деб ёзади «РБК».
«Бизда Россия Молдовага ҳужум қилишни режалаштираётгани бўйича ахборот йўқ. Бизда мавжуд маълумотлар муайян даражадаги хавфсизлик ҳиссини беради, аммо биз, масалан, ярим йилдан кейин нима бўлишини билмаймиз», — деди у.
Шунингдек, у Молдовада рус тилида сўзлашувчи аҳолига жабр-зулм қилинмаслигини, уларнинг ҳуқуқ ва эркинликларига ҳеч ким тегмаслигини маълум қилди.
Апрелда Россия Марказий ҳарбий округ қўшинлари қўмондонининг ҳарбий-сиёсий масалалар бўйича ўринбосари генерал майор Рустам Миннекаев махсус операциянинг иккинчи босқичи доирасида Россия қўшинлари Донбасс ва Жанубий Украинани назорат остига олиши кераклигини айтди. Бу, унинг сўзларига кўра, Қримга, шунингдек, «рус тилли аҳолига зулм ўтказилиши ҳолатлари қайд этилаётган» Приднестровьега йўлак очиб беради. Приднестровье — СССР таркибидаёқ Молдовадан мустақил бўлиб ажралиб чиққанини эълон қилган тан олинмаган республика. Кишинёв ва Тирасполь ўртасидаги низо 30 йилдан буён тартибга солингани йўқ.
Россия ташқи ишлар вазири Сергей Лавров Молдова Россиянинг Украинадаги махсус операциясидан хавфсираши керакми, деган саволга жавобан, мамлакатни НАТОга жалб қилишга уринишларни кўраётганини айтганди. «Улар ўз келажаги ҳақида қайғуриши керак, чунки уларни НАТОга тортишяпти. Бу Молдова хавфсизлигини оширади, деб ўйламайман», — деган эди Россия ташқи ишлар вазири.
Шу билан бирга, Лавровнинг сўзларига кўра, Молдовага Евроиттифоққа қўшилиш учун номзод мақомининг тақдим этилиши Россия учун таҳдид ҳусобланмайди.
Молдова Евроиттифоқ билан яқинлашув бўйича фаол сиёсат олиб бормоқда. Мамлакат Украина билан бир қаторда Евроиттифоққа аъзолик номзодини олди. Айни вақтда, Молдова ҳукумати мамлакат НАТОга қўшилишни режалаштирмаётгани, унинг бетарафлиги эса конституцияда белгиланганини бир неча марта айтганди. Украинанинг НАТО томонига қаратилган фаол қадамларини Россия ҳукумати махсус операциянинг сабабларидан бири деб атаган.
Изоҳ (0)