BMW kompaniyasi yangi M3 Touring universalini taqdim etdi. Mashina mustahkam kuzov va oddiy M-versiyalarning barcha afzalliklarini o‘zida mujassam etgan.
BMW M3 Touring Nyurburgring “Shimoliy sirtmog‘i”dagi eng tezkor universalga aylangan, u Mercedes-AMG E 63 S’ning natijasini 10 soniyaga yaxshilagan. Yangi model trassani 7 daqiqa va 35,060 soniyaga bosib o‘tgan.
Avtomobilning old qismi BMW M3 sedanining dizaynini to‘liq takrorlaydi, orqa qismi esa kuzovi biroz bo‘rtib chiqqan M3 ga o‘xshab ketadi. Shu bilan birga, modelning o‘lchamlari sezilarli darajada oshgan — uzunligi 85 millimetrga, eni 76 millimetrga.
Avtomobil saloni oddiy M3 bilan taqqoslaganda katta o‘zgarishga uchragan: egilgan displeyga ega iDrive 8 axborot-multimediya kompleksi, 12,3 dyuymli qurilmalar paneli va 14,9 dyuymli multimediya ekrani.
M3 Touring’ning bazaviy modeliga 19 dyuymli old va 20 dyuymli orqa g‘ildirak diskalari “kiygizilgan”. Orqa diffuzor, shuningdek, tom va reyling qismi kuzov asosiy rangidan mustaqil bo‘lgan qora rangga bo‘yalgan.
“O‘qlangan” universal kapoti ostidan uch litrli “turbooltilik” o‘rin olgan bo‘lib, u 510 ot kuchi va 650 Nm aylanuvchi momentni taqdim etishga qodir. Qayta sozlangan “avtomati” uzatmalar qutisi va M XDrive to‘liq uzatmali dvigatel yordamida avtomobil soatiga 100 kilometr tezlikka 3,6 soniyada erishadi.
Yevropada BMW M3 Touring’ning bazaviy jamlanmasi 97,8 ming yevrodan sotuvga chiqqan.
Avvalroq AQSHda ko‘zi ojiz poygachi soatiga 340 km tezlikda harakatlangani, Audi RS 3 Nyurburgringda yangi tezlik rekordini o‘rnatgani to‘g‘risida xabar berilgandi.
Izoh (0)