BMW Ньюрбургрингнинг энг тезкор универсали — M3 Touring’ни тақдим этди (видео)

BMW компанияси янги M3 Touring универсалини тақдим этди. Машина мустаҳкам кузов ва оддий М-версияларнинг барча афзалликларини ўзида мужассам этган.

BMW M3 Touring Нюрбургринг «Шимолий сиртмоғи»даги энг тезкор универсалга айланган, у Mercedes-AMG E 63 S’нинг натижасини 10 сонияга яхшилаган. Янги модель трассани 7 дақиқа ва 35,060 сонияга босиб ўтган.

Автомобилнинг олд қисми BMW М3 седанининг дизайнини тўлиқ такрорлайди, орқа қисми эса кузови бироз бўртиб чиққан М3 га ўхшаб кетади. Шу билан бирга, моделнинг ўлчамлари сезиларли даражада ошган — узунлиги 85 миллиметрга, эни 76 миллиметрга.

Автомобиль салони оддий М3 билан таққослаганда катта ўзгаришга учраган: эгилган дисплейга эга iDrive 8 ахборот-мультимедия комплекси, 12,3 дюймли қурилмалар панели ва 14,9 дюймли мультимедия экрани.

M3 Touring’нинг базавий моделига 19 дюймли олд ва 20 дюймли орқа ғилдирак дискалари «кийгизилган». Орқа диффузор, шунингдек, том ва рейлинг қисми кузов асосий рангидан мустақил бўлган қора рангга бўялган.

«Ўқланган» универсал капоти остидан уч литрли «турбоолтилик» ўрин олган бўлиб, у 510 от кучи ва 650 Нм айланувчи моментни тақдим этишга қодир. Қайта созланган «автомати» узатмалар қутиси ва М ХDrive тўлиқ узатмали двигатель ёрдамида автомобиль соатига 100 километр тезликка 3,6 сонияда эришади.

Европада BMW M3 Touring’нинг базавий жамланмаси 97,8 минг евродан сотувга чиққан.

Аввалроқ АҚШда кўзи ожиз пойгачи соатига 340 км тезликда ҳаракатлангани, Audi RS 3 Ньюрбургрингда янги тезлик рекордини ўрнатгани тўғрисида хабар берилганди.