Samarqandda turistlarga elektromobillar ijaraga berilish yo‘lga qo‘yiladi. Bu haqda Samarqand viloyati hokimining turizm, sport, madaniyat, madaniy meros va ommaviy kommunikatsiyalar masalalari bo‘yicha o‘rinbosari — viloyat turizm va sport bosh boshqarmasi boshlig‘i Rustam Qobilov ma’lum qildi, deb xabar beradi “Zarnews”.
Ma’lum qilinishicha, ijaraga beriladigan Volkswagen va Mercedes-Benz elektromobillarida Wi-Fi orqali internet ham uzatiladi. Shuningdek, chet tillardan tarjimon va gid xizmati talabga ko‘ra ajratiladi.
“Mazkur xizmat tajriba sifatida Samarqand xalqaro aeroportida 10-iyundan ish boshlaydi”, — deb yozadi Qobilov.
Avvalroq O‘zbekiston tarixi, madaniyati va o‘zbek tilining xorij davlatlarida targ‘ibotiga 10 mlrd so‘m ajratilishi mumkinligi, O‘zbekiston va Rossiya turizm sohasidagi hamkorlikni rivojlantirishga kelishib olgani to‘g‘risida xabar berilgandi. May boshlarida O‘zbekistonda tungi vaqtda faoliyat yurituvchi turistik obyektlar uchun yangi qoidalar tasdiqlangan edi.
Izoh (0)