АҚШ Россияга қарши санкцияларнинг таъсиридан ҳафсаласи пир бўлди

Россияга қарши санкциялар киритган мамлакатлар кучайиб бораётган иқтисодий муаммоларга дуч келмоқда, аммо бу чекловларнинг ўзи Москванинг хатти-ҳаракатларига кўп таъсир қилмаяпти, деб ёзади The New York Times.

Қилинаётган саъй-ҳаракатларга қарамасдан, нефть нархлари рекорд ўрнатмоқда, рубль эса февралда тушиб кетганидан кейин июнда долларга нисбатан етти йиллик максимумга етди. Шунингдек, АҚШ нефть эмбаргоси ва Россия нефтининг Евроиттифоққа импорти қисқариши фонида АҚШда ва Европада ёнилғи нархлари кескин кўтарилиб кетди, шу билан бирга, баъзи штатларда бензиннинг ўртача нархи бир галлон учун 5 доллардан ошади, дея қайд этади мақола муаллифлари.

«Энг алам қиладигани шуки, санкциялар ва улар билан боғлиқ эмбарго Американинг бош стратегик рақобатчиси — Хитойга паст нархларда катта ҳажмда нефть сотиб олиш имконини беради, чунки Россия йўқотилган даромадларни қоплаш учун талабгорларни қидирмоқда», — деб ёзади NYT.

Газета Стратегик ва халқаро тадқиқотлар маркази илмий ходими, АҚШ разведкасининг иқтисодий масалалар бўйича собиқ юқори мансабли ходими Жерард Дипиппонинг гапларини келтириб ўтди, унинг фикрича, янги санкциялар ихтилофни мақбул йўл билан тугатиш учун етарли бўлмайди. «Умуман олган, фикримча, санкцияларнинг сиёсий чегарасига етиб келдик», — деди у.

Мақола муаллифлари қайд этишича, АҚШ томонидан Эрон, Сурия, Шимолий Корея, Венесуэла ва Кубага нисбатан киритилган санкциялар ушбу ҳукуматларнинг хатти-ҳаракатларини аҳамиятли даражада ўзгартира олмади — санкцияларнинг асосий оғирлиги оддий фуқаролар елкасига тушмоқда, режим тарафдорлари эса фойда чиқариб олиш усулларини топмоқда.

Аввалроқ АҚШ давлат котиби Энтони Блинкен Ғарб санкциялари аллақачон Россиянинг иқтисодий ва молиявий тизимига «драматик» таъсир ўтказганини ва россияликлар уларнинг кундалик ҳаётдаги таъсирини ҳис қилишини айтганди. Унинг таъкидлашича, санкциялар Россияни кенг доирадаги товарлар ва технологиялардан маҳрум қилган, рублни беқарорлаштирган бўлиб, 2022 йилда унинг иқтисодиёти 10—15 фоизга пасайишига олиб келади. Блинкен огоҳлантиришича, Украинада жанговар ҳаракатлар тўхтатилмагунича, АҚШ шериклари билан санкцияларни кучайтиришда давом этади.

Февраль охиридан буён АҚШ, Евроиттифоқ, Буюк Британия ва бошқа бир қатор мамлакатлар Россияга қарши санкцияларнинг бир нечта пакетини киритди. Чекловлар сиёсий элита, бизнесменлар, кўмир ва нефть етказиб бериш, саноат, банк сектори ва иқтисодиётнинг бошқа соҳаларига тегишли бўлди.

Россия ҳукумати бир томонлама чеклов чораларининг ноқонунийлигини бир неча марта айтиб ўтган, шунингдек, улар чекловларни киритган мамлакатларнинг иқтисодиётига жиддий салбий таъсир ўтказишини таъкидлаган эди. Хусусан, президент Владимир Путин Евроиттифоқ Россияга қарши санкциялардан кўрадиган эҳтимолий талафотни 400 миллиард долларга баҳолаган эди.