Axborot texnologiyalari va kommunikatsiyalarini rivojlantirish vaziri Sherzod Shermatov AQSHga tashrifi doirasida Apple kompaniyasining davlat tashkilotlari bilan aloqalarga mas’ul rahbarlari bilan uchrashdi.
Uchrashuvda kompaniya va AKT vazirligi o‘rtasida hamkorlikni yo‘lga qo‘yish masalalari muhokama qilindi.
Shuningdek, O‘zbekistonda Apple kompaniyasi faoliyatini kengaytirish, jumladan, joriy etilayotgan 5G tarmoqlarida iPhone’dan foydalanish imkoniyatini yo‘lga qo‘yish va Appstore’da mahalliy dasturchilarga imkoniyatlarni kengaytirish masalalariga e’tibor qaratildi.
Kompaniya vakillariga kelgusida mamlakatimizda Apple Pay tizimini joriy etish, Swift dasturlash tilini ommalashtirish yo‘nalishlarida ham hamkorlik qilish taklif etildi.
Apple Pay o‘zi nima va qayerlarda bor?
Bu ilova mobil aloqa uchun to‘lov tizimi va raqamli hamyon xizmati bo‘lib, Apple kompaniyasi 2014-yilda taqdim etgan.
Xizmat foydalanuvchilarga sotuv joyida yaqin aloqa yordamida mahsulot va xizmatlar uchun iOS ilovalari orqali yoki masofadan turib to‘lash imkonini beradi.
Ilova Afrikada faqatgina Janubiy Afrika davlatida bor. Yevropaning aksariyat mamlakatlari bu xizmatdan doimiy foydalanadi.
Osiyoda esa Yaponiya, Xitoy, Singapur Qatar va boshqa arab davlatlarida ushbu to‘lov tizimi mavjud. Qo‘shni Qozog‘istonda ham Apple Pay’dan foydalaniladi.
Avvalroq Sherzod Shermatov Apple, Google, Meta va boshqa kompaniyalar bilan muzokaralar olib borish uchun AQSHga borgani haqida xabar berilgan edi.
Izoh (0)