Ахборот технологиялари ва коммуникацияларини ривожлантириш вазири Шерзод Шерматов АҚШга ташрифи доирасида Apple компаниясининг давлат ташкилотлари билан алоқаларга масъул раҳбарлари билан учрашди.
Учрашувда компания ва АКТ вазирлиги ўртасида ҳамкорликни йўлга қўйиш масалалари муҳокама қилинди.
Шунингдек, Ўзбекистонда Apple компанияси фаолиятини кенгайтириш, жумладан, жорий этилаётган 5G тармоқларида iPhone’дан фойдаланиш имкониятини йўлга қўйиш ва Appstore’да маҳаллий дастурчиларга имкониятларни кенгайтириш масалаларига эътибор қаратилди.
Компания вакилларига келгусида мамлакатимизда Apple Pay тизимини жорий этиш, Swift дастурлаш тилини оммалаштириш йўналишларида ҳам ҳамкорлик қилиш таклиф этилди.
Apple Pay ўзи нима ва қаерларда бор?
Бу илова мобил алоқа учун тўлов тизими ва рақамли ҳамён хизмати бўлиб, Apple компанияси 2014 йилда тақдим этган.
Хизмат фойдаланувчиларга сотув жойида яқин алоқа ёрдамида маҳсулот ва хизматлар учун iOS иловалари орқали ёки масофадан туриб тўлаш имконини беради.
Илова Африкада фақатгина Жанубий Африка давлатида бор. Европанинг аксарият мамлакатлари бу хизматдан доимий фойдаланади.
Осиёда эса Япония, Хитой, Сингапур Қатар ва бошқа араб давлатларида ушбу тўлов тизими мавжуд. Қўшни Қозоғистонда ҳам Apple Pay’дан фойдаланилади.
Аввалроқ Шерзод Шерматов Apple, Google, Меtа ва бошқа компаниялар билан музокаралар олиб бориш учун АҚШга боргани ҳақида хабар берилган эди.
Изоҳ (0)