Rossiyada Chevrolet avtomobillari deyarli tugadi. Yetkazib berish esa to‘xtatilgan

Rossiyada Chevrolet avtomobillari tugab bormoqda. Bu haqda Autostat xabar berdi. 

UzAuto Motors AQSH sanksiyalariga tushib qolmaslik uchun Rossiyaga ommaviy ishlab chiqarilgan Chevrolet modellarini yetkazib berishni mart oyida to‘xtatgan edi. 

Bugungi kunga qadar dilerlar barcha zaxiralarni deyarli sotib yuborishdi: Rossiyaning turli hududlarida kam sonli Chevrolet Nexia va Cobalt hali ham mavjud, biroq Spark allaqachon sotilib ketgan. 

Autoreview nashrining yozishicha, aprel oyi o‘rtalarida Amerikaning General Motors konserni o‘zi bilan Cadillac va Chevrolet premium modellarini olib, Rossiya bozorini tark etgan. 

Aftidan, ommaviy segmentdagi Chevrolet avtomobillarini yetkazib berish ham tiklanmaydi. Rossiya bozorida Spark, Nexia va Cobalt modellarini taqdim etuvchi Chevrolet rasmiy distribyutori “Keles Rus” kompaniyasi faoliyatini to‘xtatdi va hatto o‘z veb-saytini yopdi. 

Rossiyaga ommaviy segmentdagi Chevrolet avtomobillarini yetkazib berish haqiqatan ham to‘xtatildi va ularni qayta tiklash to‘g‘risida qaror qabul qilinmadi. Menimcha, bu sanksiyalar rejimi umuman o‘zgartirilsagina, sodir bo‘lishi mumkin, — deydi “Keles Rus” ijrochi direktori.

Chevrolet Spark Rossiyaga Asaka shahrida joylashgan UzAuto Motors zavodi tomonidan, Chevrolet Cobalt va Nexia esa Qo‘stanay (Qozog‘iston) shahridagi “SaryarkaAvtoProm” zavodidan yetkazib berilgan.

Avvalroq General Motors Rossiyani butunlay tark etmoqchi ekanligi haqida xabar berilgan edi.