Samarqand viloyati Toyloq tumanida Malibu va Nexia-2 ishtirokida yo‘l-transport hodisasi sodir bo‘ldi, deya xabar qilmoqda IIV axborot xizmati.
Ma’lum qilinishicha, 2022-yil 23-iyun kuni soat 00:30 larda Samarqand viloyati Toyloq tumani “Charog‘bon” mahallasi hududidan o‘tuvchi A-377 avtomobil yo‘lining 7-kilometrida Toyloq tumani IIB profilaktika inspektori leytenant M.Xursandov boshqaruvida bo‘lgan Nexia-2 avtomashinasi yo‘lning Urgut yo‘nalishi tomon qayrilayotgan vaqtida, qarama-qarshi tomonidan harakatlanib kelayotgan Toyloq tumanida yashovchi 2003-yilda tug‘ilgan fuqaro A.P.ning boshqaruvida bo‘lgan Malibu rusumli avtomashinasi bilan to‘qnashuv sodir bo‘lgan.
Oqibatda Nexia-2 da bo‘lgan M.Xursandov, yo‘lovchilari Toyloq tumani IIB HPB katta profilaktika inspektori mayor R.Razzoqov hamda Toyloq tumanida yashovchi, 1957-yilda tug‘ilgan fuqaro Sh.M.lar olgan og‘ir tan jarohatlari oqibatida vafot etgan.
Nexia-2 ning qolgan yo‘lovchilari Toyloq tumanida yashovchilar 1992-yilda tug‘ilgan A.I. va 1994- yilda tug‘ilgan N.M. hamda Malibu haydovchisi A.P., yo‘lovchilari Toyloq tumanida yashovchilar 2005-yilda tug‘ilgan A.M. va 2004-yilda tug‘ilgan A.R.lar tan jarohati olib, tuman tibbiyot birlashmasiga yotqizilganlar.
Mazkur holat yuzasidan 2022-yil 23-iyun kuni Toyloq tumani prokuraturasi tomonidan Jinoyat kodeksining 266-moddasi 3-qismi “a” bandi (odamlar o‘limiga sabab bo‘lgan transport boshqarish xavfsizligi qoidalarini buzish) bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)