Farg‘ona viloyatining Rishton tumanida Qirg‘iziston Respublikasiga noqonuniy olib o‘tuvchi yerosti yo‘li aniqlandi. Bu haqda Davlat xavfsizlik xizmati xabar qildi.
Qayd etilishicha, 23-iyun kuni DXX Chegara qo‘shinlari harbiy xizmatchilari tomonidan DXX Farg‘ona viloyati bo‘yicha boshqarmasi hamda viloyat IIB bilan hamkorlikda tezkor tadbir o‘tkazgan. Jarayon davomida Rishton tumanida yashovchi fuqaro T.M. boshqaruvidagi yuk avtomashinasi to‘xtatilib, ko‘zdan kechirilgan. Natijada avtomashinada tegishli hujjatlari bo‘lmagan, taxminiy qiymati 15 milliard so‘mlik 2707 dona mobil telefonlar (IPhone 13 Pro Max, Samsung Galaxy S 22 Ultra, Redme Note 11 Pro va hokazo) borligi aniqlanib, protsessual tartibda rasmiylashtirib olingan.
Shuningdek, tezkor tadbir davom ettirilib, fuqaro T.M. yashash xonadoni ko‘zdan kechirilgan. Natijada Qirg‘izistonning Botken viloyati Qadamjoy rayoni hududiga olib o‘tuvchi, eni 1—1,5 metr, balandligi 2 metr, uzunligi taxminan 130 metr bo‘lgan yerosti yo‘li mavjudligi aniqlangan.
Ushbu yer osti yo‘li Qirg‘iziston Respublikasidan tovar-moddiy boyliklar olib o‘tishga mo‘ljallangan.
Hozirda holat yuzasidan Jinoyat kodeksining tegishli moddalari bilan jinoyat ishi qo‘zg‘atilgan.
Eslatib o‘tamiz, bu O‘zbekiston va Qirg‘izistonni bog‘lovchi noqonuniy tunnel topilishi bilan bog‘liq to‘rtinchi holat hisoblanadi. May oyida Qorasuv tumanida Qirg‘iziston va O‘zbekistonni yerosti yo‘li orqali bog‘lab turuvchi tunnel topilgani xabar qilingandi. Ushbu tunnel aniqlangan hudud egasi Jalolobod tumanining “Qiziljar” posyolkasidagi ruhiy kasalliklar shifoxonasida davolanayotgani sabab unga nisbatan qayta tibbiy tekshiruv o‘tkazish rejalashtirilgan.
7-iyun kuni ham Qirg‘iziston xavfsizlik kuchlari tomonidan O‘zbekiston bilan chegarada 155 metrlik yerosti tunneli aniqlangan. 13-iyun kuni esa uchinchi tunnel ham topilgan. U orqali Qirg‘izistondan O‘zbekistonga valyuta va tovarlar olib o‘tish rejalashtirilgan. Qirg‘iziston tomonining ma’lum qilishicha, hozirda tergov davom etmoqda.
O‘zbekiston tomoni esa yashirin tunnellar qazigan shaxslarga sud hukmi o‘qilgani haqida xabar berdi. Ularga 6 yildan 8 yilgacha ozodlikdan mahrum qilish jazosi tayinlangan.
Izoh (0)