Buxoroda spirtli ichimlik iste’mol qilgan ota turmush o‘rtog‘i bilan o‘rtasida chiqqan janjal oqibatida 1 yoshli farzandini devorga otib yuborib, unga og‘ir tan jarohati yetkazdi. U holatning oldini olishga yetib kelgan IIB xodimlariga ham faol qarshilik ko‘rsatgan. Fuqaroga jinoyat ishi qo‘zg‘atildi, deya “Daryo”ga xabar berdi viloyat prokuraturasi axborot xizmati rahbari.
Ta’kidlanishicha, joriy yilning 23-iyun kuni, soat 20:30 larda Jondor tumanida yashovchi U.R. mast holatda o‘z xonadoniga kirib kelgan. Turmush o‘rtog‘i A.N. bilan sababsiz janjal ko‘targan va uni kaltaklab, tana a’zolarining turli qismlariga jarohat yetkazgan. Ayni shu paytda qo‘rquvdan chinqirib yig‘lab yuborgan bir yoshli bolasi Z.R.ni zarb bilan devorga otib yuborib, og‘ir tan jarohati yetkazgan.
U.R.ning otasi fuqaro O‘.R. o‘g‘lini shafqatsiz xatti-harakatlardan to‘xtatishga uringan, ammo unga kuchi yetmagan uchun tezkorlik bilan ichki ishlar bo‘limiga xabar bergan.
Hodisa joyiga ichki ishlar xodimlari yetib kelgan. Lekin U.R. huquq posbonlarining qonuniy talablariga bo‘ysunmasdan, ularni omma oldida obro‘ysizlantirish maqsadida haqorat qilgan. Xizmat vazifasini bajarayotgan IIB xodimi Sh.Sh.ning ko‘ziga urib, unga ham tan jarohati yetkazgan. Shuningdek, IIB xodimi B.A.ning xizmat kiyimi va pogonlarini yulib, ularga faol qarshilik ko‘rsatgan.
U.R.ning jinoiy harakatlari to‘xtatilib, boshqa jinoyatlarni sodir etishga qaratilgan harakatlarining oldi olingan.
Ichki ishlar xodimlari va shifokorlarning o‘z vaqtida ko‘rsatgan sa’y-harakatlari tufayli Z.R.ning hayoti saqlab qolingan.
Sud-tibbiy ekspertizaning ma’lumotiga ko‘ra, Z.R. bosh miya yopiq jarohati, bosh miya chayqalishi, peshona sohasi yumshoq to‘qimasi lat yeyishi va teri ko‘karishi kabi tan jarohatlari olgani aniqlangan.
Mazkur holat yuzasidan Jondor tuman prokuraturasi tomonidan fuqaro U.R.ga nisbatan Jinoyat kodeksining tegishli moddalari bilan jinoyat ishi qo‘zg‘atilgan.
Hozirda dastlabki tergov harakatlari olib borilmoqda.
Izoh (0)