Qashqadaryo viloyati Muborak, G‘uzor tumanlari va Samarqand shahrida valyuta oldi-sotdisi bilan shug‘ullanib kelgan fuqarolar aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Muborak tuman bo‘limi tomonidan tezkor tadbir o‘tkazilgan. Unda “Muborak dehqon bozori” oldida valyuta qimmatliklarini muomalaga kiritish faoliyati shug‘ullanib kelayotgan O.N. boshqa bir fuqaro X.ga jami 3 700 dollarni 41 million so‘mga sotgan vaqtida ashyoviy dalillar bilan ushlangan.
Boshqa holatda departamentning G‘uzor tuman bo‘limi tomonidan tezkor tadbir o‘tkazilgan. Unda “G‘uzor dehqon bozori” oldida valyuta qimmatliklarini muomalaga kiritish faoliyati shug‘ullanib kelayotgan A.Q. fuqaro N.ga jami 3 ming dollarni 33,3 million so‘mga sotgan vaqtida ashyoviy dalillar bilan qo‘lga olingan.
Shuningdek, departamentning Samarqand shahar bo‘limi tomonidan Milliy gvardiya xodimlari bilan hamkorlikda tezkor tadbir o‘tkazilgan. Unda fuqaro P.M. “Erkin savdo” majmuasi oldida valyuta qimmatliklari savdosi bilan shug‘ullanib kelgani aniqlangan. U fuqaro A.ga jami 2 950 dollarni 33,9 million so‘mga sotgan vaqtida ashyoviy dalillar bilan ushlangan.
Holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Mavzuga doir:
Izoh (0)