Oliy va o‘rta maxsus ta’lim vazirligi “Respublika oliy ta’lim muassasalari talabalari bandligini ta’minlash va ularning bo‘sh vaqtlarini samarali tashkil etish chora-tadbirlari to‘g‘risida”gi prezident qarori loyihasini muhokamaga qo‘ydi.
Talabalar bandligini ta’minlash va bo‘sh vaqtini samarali tashkil etish asosiy yo‘nalishlari etib quyidagilar belgilanadi:
- oliy ta’lim muassasasida mavjud infratuzilmalardan, shu jumladan, o‘quv binolar, sport inshootlari, madaniyat saroylari, talabalar turar joylari, o‘quv-xo‘jalik maydonlaridan talabalar uchun ish o‘rinlarini yaratishda foydalanish;
- oliy ta’lim muassasasida mavjud bo‘sh ish o‘rinlariga (o‘quv yordamchi va texnik lavozimlar, kabinet mudiri, arxiv mudiri, kompyuter zali mudiri, uslubchi, laborant kabilarga) talabalarni ishga qabul qilishda ustuvorlik berish;
- talabalarni kasbiy rivojlantirish, ish beruvchiga o‘zini taqdim etishga tayyorlashga qaratilgan yangi boshqaruv mexanizmlarini joriy etish;
- talabalarni haq to‘lanadigan jamoat ishlariga, respublika miqyosidagi ro‘yxatga olishlar, sotsiologik tadqiqotlar, so‘rovlar va xatlovlarni o‘tkazish ishlariga jalb qilish;
- oliy ta’lim muassasalari talabalarining rasmiy mehnat faoliyatini olib borishlarini qo‘llab-quvvatlash hamda o‘rnatilgan cheklovlarni yengillashtirish yoki to‘liq olib tashlash;
- munosib ish o‘rinlarini taklif etishga qaratilgan elektron platforma yaratish;
- magistratura, klinik ordinatura bosqichi birinchi kursidan boshlab to‘liq stavkagacha mehnat faoliyatini amalga oshirishiga ruxsat berish;
- talabalar bandligini ta’minlashni oliy ta’lim muassasalari asosiy vazifalaridan biri sifatida belgilash.
Markazlarning asosiy vazifalari etib quyidagilar belgilanadi:
- o‘qishdan bo‘sh vaqtlarida mehnat faoliyatini olib borish istagini bildirgan talabalarning rasmiy bandligini ta’minlash choralarini ko‘rish;
- oliy ta’lim muassasasining ixtisosligidan kelib chiqib, ish beruvchilar bazasini shakllantirish va onlayn platforma bilan integratsiyasini ta’minlash;
- Karyera kunlarini muntazam ravishda tashkil etish, korxonalarga rasmiy tashriflar uyushtirish, muvaffaqiyatga erishgan biznes va davlat xizmati vakillari bilan mahorat darslarini tashkil etish;
- potensial ish beruvchilar bilan hamkorlik shartnomalarini imzolash, ular tomonidan taqdim etilgan vakansiyalar va kadrlarga bo‘lgan ehtiyojni qanoatlantirish;
- talabalar stajirovka va amaliyotini tashkil etish uchun ish beruvchilar bilan doimiy hamkorlik aloqalarini o‘rnatish;
- talabalarning kelgusi hayotida zarur bo‘ladigan ko‘nikma va hunarlarni kasbga o‘qitish markazlarida o‘rgatishni tashkil etish;
- ish bilan band bo‘lgan talabalar hisobini yuritish va ushbu yo‘nalishda ularga barcha konsalting xizmatlarini ko‘rsatish;
- norasmiy sektorda band bo‘lgan talabalarni monitoringini yuritish va ularni rasmiy sektorga o‘tkazish bo‘yicha chora-tadbirlarni amalga oshirish.
Markaz bosh menejeri o‘z maqomiga ko‘ra oliy ta’lim muassasasi bo‘lim boshlig‘iga va Markaz menejerlari oliy ta’lim muassasasining tegishli mutaxassislarga tenglashtiriladi hamda kunduzgi talabalar sonidan kelib chiqib belgilanadi.
Avvalroq Oliy va o‘rta maxsus ta’lim vazirligi markaziy apparati kengaytirilib, vazifalar qayta taqsimlangani to‘g‘risida xabar berilgandi.
Izoh (0)