YUNISEF bolalar va ayollarga nisbatan zo‘ravonlikka befarqlikdan ogohlantirdi va jamiyatning bunday holatlarga munosabatini o‘zgartirishga chaqirdi. Tashkilot zo‘ravonlikka uchraganlarni himoya qilish uchun oilani qo‘llab-quvvatlash xizmatlari va samarali tizimlarni takomillashtirish muhimligini ta’kidlagan, deb xabar beradi tashkilot matbuot xizmati.
Ijtimoiy tarmoqlarda O‘zbekistonda ayollar va bolalarga nisbatan zo‘ravonlik holatlari aks ettirilgan bir qancha videolavhalar tarqalganidan so‘ng, YUNISEF odatiy hol bo‘lib ko‘ringan bunday holatlardan xavotirda ekanini bildirgan: ayrim hodisalar, jumladan, go‘daklar bilan bog‘liq bo‘lganlari, jamoatchilik ko‘z oldida va kuzatuvchilar ishtirokida sodir bo‘lmoqda
“Ayollar va bolalar, ayniqsa qizlar, har kuni zo‘ravonlikdan aziyat chekmoqda va bu, afsuski, maqbul, normal, yo‘l qo‘yish mumkin bo‘lgan va ‘oilaning ishi’ deb qaraladi. Zo‘ravonlik holatlarining oldini olish mumkin. Zo‘ravonlikka barham berishda har kimning o‘rni bor. Odamlarning zo‘ravonlikka munosabatini o‘zgartirish, jazosiz qolishga chek qo‘yish, ijobiy tarbiya me’yorlari va amaliyotini targ‘ib qilish, jabrlanganlarga malakali yordam ko‘rsatish zarur”, — deydi YUNISEF’ning O‘zbekistondagi vakolatxonasi rahbari Munir Mamedzade.
“Hozirda YUNISEF O‘zbekistonda zo‘ravonlik holatlarining oldini olish va ularga qarshi kurashish sohasidagi davlat tuzilmalarining sa’y-harakatlarini qo‘llab-quvvatlamoqda. Masalan, Sog‘liqni saqlash vazirligi bilan hamkorlikda olib borilgan ishlar natijasida butun mamlakat bo‘ylab 50 ming nafar patronaj hamshiralar oilalarga tashrif buyurish uchun zarur ko‘nikma va materiallarga ega bo‘lib, ular boshqa masalalar qatorida bola tarbiyasini qo‘llab-quvvatlash, bolalar ehtiyojlariga befarqlik va jismoniy zo‘ravonlik holatlarini aniqlashlari mumkin”, — deyiladi xabarda.
YUNISEF, shuningdek, bolalarga nisbatan zo‘ravonlik holatlarini aniqlash va ularga javob berish bo‘yicha standart protseduralarni ishlab chiqish va tatbiq etish borasida Vazirlar Mahkamasining Ta’lim va sog‘liqni saqlash kotibiyatining Bolalarni himoya qilish bo‘yicha yangi sektori, Bolalar masalalari bo‘yicha milliy komissiya va Bolalar ombudsmani bilan hamkorlik qilmoqda. Bundan tashqari, YUNISEF har bir holatni alohida ko‘rib chiqish (keys menejment) tizimini kengaytirishda mamlakatga ko‘mak bermoqda.
“Mazkur tizim oilalar ehtiyojlarini keng miqyosda ko‘rish, xavflarni aniqlash va oilalarni har tomonlama qo‘llab-quvvatlash uchun ularni tegishli xizmatlar bilan bog‘lash imkonini beradi. Amalga oshirilayotgan barcha chora-tadbirlar bilan bir qatorda ijtimoiy ishchilar institutini yaratish va bu muammoni tizimli hal qilish uchun butun jamiyatni safarbar etish zarur”, — deya ta’kidlanadi xabarda.
Avvalroq ijtimoiy tarmoqlarda ayol yosh go‘dagiga shafqatsiz munosabatda bo‘layotgani aks etgan video tarqalgandi. Voqea Samarqand viloyati Payariq tumani 1-son Chelak shifoxonasida sodir bo‘lgan. O‘zbekistonda Bola huquqlari bo‘yicha vakil Aliya Yunusova farzandini zo‘ravonlik bilan “tarbiyalaydigan” ota-onalardan ularni olib qo‘yishni taklif qilgandi.
Izoh (0)