Farg‘ona shahrida Janubiy Koreya xalqaro hamkorlik agentligi — KOICA bilan sheriklikda tashkil etilgan ishsiz fuqarolarni kasb-hunarga o‘qitish markazi ish boshladi. Prezident Shavkat Mirziyoyev joriy yil may oyida Farg‘onaga tashrifi davomida ushbu markaz faoliyati bilan tanishgandi. Davlat rahbari o‘quv jarayonlarini ko‘zdan kechirib, yoshlar va xotin-qizlar bilan suhbatlashgandi.
“O‘qish, izlanishga hech qachon kech emas. Kelib, kasb o‘rganayotganingiz ertangi kuningizga befarq emasligingizdan dalolat. Biroz qiyin bo‘lar. Lekin o‘zingizni, farzandlaringiz kelajagini o‘ylasangiz, shunga qunt qiling. Qiyinchilik o‘tib ketadi, siz boylik yaratyapsiz”, — degan edi Prezident uchrashuv davomida.
“Daryo” muxbiri Azizjon Ermatov ushbu markazda bo‘lib, ishsiz fuqarolarni kasb-hunarga o‘qitish jarayoni bilan tanishdi.
Ma’lum qilinishicha, ushbu majmuada elektronika, axborot texnologiyalari, avtomobilsozlik, tikuvchilik, sartaroshlik-kosmetologiya kabi talab yuqori kasblar bo‘yicha mutaxassislar tayyorlanadi.
Markazga ta’lim jarayonida foydalaniladigan 538 turdagi zamonaviy uskuna va jihozlar Janubiy Koreyadan olib kelingan. O‘quv-mashg‘ulotlar ham ushbu mamlakat dastur va qo‘llanmalari asosida o‘tiladi. Buning uchun besh nafar koreyalik murabbiy jalb qilingan.
Markaz Vazirlar Mahkamasining “O‘zbekiston Respublikasida ishsiz fuqarolarni kasb-hunarga o‘qitish markazlarini tashkil etish chora-tadbirlari to‘g‘risida”gi qarori asosida tashkil etilgan.
Loyihani amalga oshirish uchun Koreya xalqaro hamkorlik agentligi tomonidan 9 million 320 ming dollar miqdorida investitsiya kiritilib, zamonaviy o‘quv va amaliyot binolari, oshxona hamda sport zalidan iborat majmua barpo etilgan.
Amaliyotga asosiy e’tibor qaratilgan ushbu o‘quv markazida bir yilda 480 nafar ishsiz fuqaroni kasbga o‘qitish imkoniyati mavjud. O‘quvchilar 6-8 oylik kurslarda kasbiy ta’lim olishadi.
“Markazimizda faqat ishsiz fuqarolar kasb-hunarga o‘rgatiladi. Bu fuqarolar joylardagi bandlikka ko‘maklashish markazlarining yo‘llanmalari asosida qabul qilinadi. Bizda o‘quv jarayoni 6 oylik nazariy mashg‘ulotlar va ikki oylik ishlab chiqarish amaliyotidan iborat. Markazni bitirganlarga o‘rta maxsus ma’lumot to‘g‘risidagi diplom beriladi. Hozirgi kunda markazda 240 nafar o‘quvchi ta’lim olmoqda. Kasb-hunar markazimiz KOICA granti asosida tashkil qilingan. Markaz qurilishi, jihozlanishi hamda o‘qituvchilarning malakasini oshirish ishlariga 9,3 million dollar mablag‘ sarflangan. Barcha yo‘nalishlar bo‘yicha o‘quv xonalari Janubiy Koreyadan keltirilgan eng so‘nggi rusumdagi uskunalar bilan jihozlangan. Bir yilda ikki marta qabul o‘tkaziladi. O‘quvchilar yo‘llanma asosida navbati bilan qabul qilinadi. Agar bir yo‘nalish bo‘yicha talabgorlar soni belgilangan kvotadan oshadigan bo‘lsa, ular uchun imtihon o‘tkaziladi. Matematika, ona tili, fizika fanlaridan imtihon topshiriladi. Amaliyot viloyatdagi yirik sanoat va ishlab chiqarish korxonalarida bo‘ladi. Markazda 16 nafar o‘qituvchi faoliyat olib boradi. O‘qituvchilar Mehnat vazirligi mutaxassislari va koreyalik ekspertlar ishtirokida o‘tkazilgan suhbat asosida ishga qabul qilingan”, — deydi markaz direktorining o‘quv ishlari bo‘yicha o‘rinbosari Odiljon Yunusov.
Bu yerda bilim olgan va amaliy mashg‘ulotlarda ishtirok etgan yoshlar nafaqat mamlakat sanoat, qurilish, axborot texnologiya tarmoqlarida ishlash malakasiga ega bo‘ladi, balki kelajakda xorijiy davlatlarda ishlash istagida bo‘lgan mehnat migrantlariga kasb o‘rgatuvchi usta vazifasini ham bajara oladi.
“O‘tgan yili qishlog‘imizdagi 2-maktabni tugatganman. Shundan beri bekor yurgandim. Bandlikka ko‘maklashish markazi xodimlaridan shunday o‘qish borligini eshitdim. Koreyaliklar yangi o‘quv markazi ochdi, deyishdi. Qiziqib keldim: qarasam sharoitlari juda yaxshi ekan. Shu yerda o‘qishga qaror qildim. Energetika yo‘nalishini tanladim, chunki oldindan shu sohaga qiziqishim bor edi. O‘qishni boshlaganimizga bir oy bo‘lib qoldi. 40 haftalik o‘quv dasturi asosida hunar o‘rganyapmiz. Ishlatayotgan texnikalarimizning hammasi Koreyadan olib kelingan. Xonadonlarning elektr montajiga, liftlar va kuzatuv kameralari o‘rnatishga qiziqaman. Markazdagi o‘qish davomida shu yo‘nalishlarni puxta o‘rganmoqchiman. Do‘stlarimga, tanishlarimga shu markazda o‘qishni tavsiya qildim. Hatto Rossiyada yurgan do‘stlarim ham kelishdi. Faqat o‘rinlar to‘lib qolgan ekan. Endi ular keyingi qabul paytida hujjat topshirishadi”, — deydi Furqat tumani Ko‘kdo‘ppi qishlog‘ida yashovchi Muhammadmirzo Farhodjonov.
Izoh (0)