ЮНИСЕФ Ўзбекистонда болалар ва аёлларга нисбатан зўравонликка чек қўйишга даъват этади

ЮНИСЕФ болалар ва аёлларга нисбатан зўравонликка бефарқликдан огоҳлантирди ва жамиятнинг бундай ҳолатларга муносабатини ўзгартиришга чақирди. Ташкилот зўравонликка учраганларни ҳимоя қилиш учун оилани қўллаб-қувватлаш хизматлари ва самарали тизимларни такомиллаштириш муҳимлигини таъкидлаган, деб хабар беради ташкилот матбуот хизмати.

Ижтимоий тармоқларда Ўзбекистонда аёллар ва болаларга нисбатан зўравонлик ҳолатлари акс эттирилган бир қанча видеолавҳалар тарқалганидан сўнг, ЮНИСЕФ одатий ҳол бўлиб кўринган бундай ҳолатлардан хавотирда эканини билдирган: айрим ҳодисалар, жумладан, гўдаклар билан боғлиқ бўлганлари, жамоатчилик кўз олдида ва кузатувчилар иштирокида содир бўлмоқда

Маълум қилинишича, дунё бўйлаб ҳар тўрт боладан бири зўравонликка дучор бўлади ва ҳар беш дақиқада бир бола зўравонликнинг турли шакллари туфайли вафот этади. Бундай ҳолатларни эрта аниқлаш, ишонч телефонлари ва мактабларда иш олиб бориш – ана шу исботланган самарали чоралар зўравонликка қарши курашда ёрдам беради. Йўналтириш механизми болаларни ҳимоя қилиш тизимини мустаҳкамлашнинг муҳим бошланғич нуқтаси бўлиб, болаларга нисбатан зўравонликнинг олдини олиш, аниқлаш ва уларга қарши курашишда таълим, соғлиқни сақлаш, ижтимоий ҳимоя ва адлия соҳалари мутахассисларининг роли ва мажбуриятларини аниқ белгилаши керак.

«Ҳозирда ЮНИСЕФ Ўзбекистонда зўравонлик ҳолатларининг олдини олиш ва уларга қарши курашиш соҳасидаги давлат тузилмаларининг саъй-ҳаракатларини қўллаб-қувватламоқда. Масалан, Соғлиқни сақлаш вазирлиги билан ҳамкорликда олиб борилган ишлар натижасида бутун мамлакат бўйлаб 50 минг нафар патронаж ҳамширалар оилаларга ташриф буюриш учун зарур кўникма ва материалларга эга бўлиб, улар бошқа масалалар қаторида бола тарбиясини қўллаб-қувватлаш, болалар эҳтиёжларига бефарқлик ва жисмоний зўравонлик ҳолатларини аниқлашлари мумкин», — дейилади хабарда.

ЮНИСЕФ, шунингдек, болаларга нисбатан зўравонлик ҳолатларини аниқлаш ва уларга жавоб бериш бўйича стандарт процедураларни ишлаб чиқиш ва татбиқ этиш борасида Вазирлар Маҳкамасининг Таълим ва соғлиқни сақлаш котибиятининг Болаларни ҳимоя қилиш бўйича янги сектори, Болалар масалалари бўйича миллий комиссия ва Болалар омбудсмани билан ҳамкорлик қилмоқда. Бундан ташқари, ЮНИСЕФ ҳар бир ҳолатни алоҳида кўриб чиқиш (кейс менежмент) тизимини кенгайтиришда мамлакатга кўмак бермоқда.

«Мазкур тизим оилалар эҳтиёжларини кенг миқёсда кўриш, хавфларни аниқлаш ва оилаларни ҳар томонлама қўллаб-қувватлаш учун уларни тегишли хизматлар билан боғлаш имконини беради. Амалга оширилаётган барча чора-тадбирлар билан бир қаторда ижтимоий ишчилар институтини яратиш ва бу муаммони тизимли ҳал қилиш учун бутун жамиятни сафарбар этиш зарур», — дея таъкидланади хабарда.

Аввалроқ ижтимоий тармоқларда аёл ёш гўдагига шафқатсиз муносабатда бўлаётгани акс этган видео тарқалганди. Воқеа Самарқанд вилояти Пайариқ тумани 1-сон Челак шифохонасида содир бўлган. Ўзбекистонда Бола ҳуқуқлари бўйича вакил Алия Юнусова фарзандини зўравонлик билан «тарбиялайдиган» ота-оналардан уларни олиб қўйишни таклиф қилганди.