Surxondaryo viloyatida tegishli ruxsatnomasiz xususiy universitet tashkil etib fuqarolardan pul undirish holati aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Surxondaryo viloyat boshqarmasi tomonidan Ta’lim sifatini nazorat qilish davlat inspeksiyasining murojaatiga asosan tergovga qadar tekshiruv o‘tkazilgan. Tekshiruvda M.J. va S.S. ismli shaxslar o‘zaro til biriktirib, “U.A.” MCHJni tashkil etgani va Telegram’da “At-Termiziy University” xususiy universiteti kanalini ochib, faoliyat yuritishga tegishli ruxsatnoma olmasdan u yerga o‘qishga qabul boshlangani haqida xabarlar bergani aniqlangan.
Ular ushbu universitetda o‘qish istagini bildirgan 73 nafar fuqaroning 306,9 million so‘mini to‘lov pullari sifatida qabul qilib olgan.
Mazkur holat yuzasidan Jinoyat kodeksining 168-moddasi (firibgarlik) jinoyat ishi qo‘zg‘atilib, tergov harakatlari o‘tkazilmoqda.
Avvalroq Andijonda 14 ming dollar evaziga tibbiyot institutiga o‘qishga kirib qo‘yishni va’da qilgan talaba ushlangani, Qashqadaryoda ikki kishini o‘qishga kiritib qo‘yish uchun 10 ming dollar pora olgan shaxs qo‘lga tushgani, Farg‘onada Toshkent tibbiyot akademiyasiga o‘qishga kiritib qo‘yish uchun 10 ming dollar olgan shaxs ushlangani to‘g‘risida xabar berilgandi.
Izoh (0)