Qashqadaryo viloyatining Mirishkor tumanida yashovchi bog‘cha qorovuli nohaq ishdan bo‘shatilganini, besh oylik maoshini ololmayotganini aytmoqda. “Daryo” muxbiri murojaatchi vajlarini o‘rgandi.
Ma’lum bo‘lishicha, murojaatchi Ibragim Jumayev 2019-yil dekabr oyida Mirishkor tumanidagi 8-sonli davlat maktabgacha ta’lim tashkilotiga qorovul sifatida ishga olingan, 2021-yilning noyabr oyida esa ishdan bo‘shatilgan.
Murojaatchi Ibragim Jumayevning aytishicha, u bog‘cha qorovuli bo‘lib ishga kirishi uchun bog‘cha mudirasi undan 100 dollar talab qilgan. U esa bog‘cha mudirasining ukasi orqali 600 ming so‘m pul bergan.
Murojaatchining qo‘shimcha qilishicha, u ish vaqtida bog‘cha mudirasi talabi bilan bolalar uchun kelgan oziq-ovqat mahsulotlarining ma’lum bir qismini uning uyiga olib borib bergan. Shuningdek, rahbar talabi bilan uning uyida ham ishlab, bog‘chadan chiqqan temirlardan bog‘cha mudirasining hovlisi uchun belanchak yasab bergan. Bora-bora talablar ko‘paygach, uni bajarishni rad qilgach, ishdan olingan.
“Bu tuhmat, aynan shu tuhmati uchun sobiq qorovulimiz sud tomonidan jarimaga ham tortilgan”, — deydi Mirishkor tumanidagi 8-sonli davlat maktabgacha ta’lim tashkiloti rahbari Durdona Toyirova.
Durdona Toyirovaning “Daryo”ga qo‘shimcha ma’lumot berishicha, sobiq qorovul boshqa bir ayol qorovulga tegajog‘lik qilgani sabab ishdan olingan.
“Kunduz kuni qorovul sifatida ishlovchi ayol kishi menga murojaat qilib, qorovul Ibragim Jumayev unga tegajog‘lik qilayotganini, ishlay olmasligini aytib, shikoyat qildi. Shundan so‘ng rahbar sifatida qorovulimiz Ibragim aka bilan gaplashib vaziyatni tushuntirdim. ‘Mayli, agar ish kerak desangiz, ayolingiznimi yoki qizingiznimi olib keling, o‘rningizga ishga olaman. Bog‘chada asosan ayollar ishlaydi. Ular ham bu holatdan norozi bo‘lmoqda. Ishchi ayollarning uydagilari ham bundan norozi bo‘lgan’, deb tushuntirdim. Shunda qorovulimiz ketdi va bir hafta ishga chiqmadi. Shundan so‘ng, hujjatlarni rasmiylashtirib, u kishini ishdan oldik”, — deydi mas’ul.
Bog‘cha rahbarining aytishicha, murojaatchining besh oylik maoshim berilmayapti degan gapi ham asossiz.
“Barcha hisob-kitoblar qilingan. Ibragim aka ishdan bo‘shatilib, bo‘sh yurgan besh oylik muddatini nazarda tutayotgan bo‘lsa, biz u kishini ishdan bo‘shatib, hujjatlarni rasmiylashtirganmiz. Bu haqda 2022-yilning 25-may kuni bo‘lib o‘tgan sudda ham aytilgan”, — deydi Durdona Toyirova.
Aniqlanishicha, 2022-yilning 25-may kuni bo‘lib o‘tgan sudda Jinoyat ishlari bo‘yicha Mirishkor tuman sudi Ibragim Jumayevni Durdona Toyirovaga tuhmat qilgan degan to‘xtamga kelib, unga bazaviy hisoblash miqdorining 6 baravari miqdorida jarima tayinlagan.
Izoh (0)