Vladimir Putin bilan birga Alyaskadagi sammitga kelgan Rossiya delegatsiyasi o‘z samolyotlariga yonilg‘i quyish uchun naqd pul to‘lashga majbur bo‘ldi. Bu haqda AQSH davlat kotibi Marko Rubio NBC efirida so‘zlab, bu holatni Rossiyaga qarshi sanksiyalar qanday ishlayotganiga misol sifatida keltirgan.
“Rossiyaliklar Alyaskaga qo‘nganlarida, yonilg‘i quyish uchun naqd pul to‘lashga majbur bo‘lishdi, chunki ular bizning bank tizimimizdan foydalana olmaydilar. Ular sanksiyalar oqibatlarini har kuni his qilishlari kerak”, dedi Rubio.
Davlat kotibining qo‘shimcha qilishicha, shunga qaramasdan sanksiyalar Rossiya-Ukraina urushining borishini o‘zgartirmagan.
“Bu sanksiyalar noo‘rin degani emas. Bu ularning urush natijasiga ta’sir qilmaganini anglatadi”, dedi AQSH davlat kotibi.
Vladimir Putin va Donald Tramp o‘rtasidagi muzokaralar 15-avgust kuni bo‘lib o‘tdi. Uchrashuv yakunlari bo‘yicha o‘tkazilgan matbuot anjumanida AQSH prezidenti “ko‘p masalalar bo‘yicha kelishuvga erishilgani”ni aytdi, biroq Rossiya va Ukraina o‘rtasida yarashuv to‘g‘risida kelishib bo‘lmaganini tan oldi.
Ma’lum qilinishicha, Rossiya hukumat va prezident ma’muriyati a’zolari, shuningdek, Kreml jurnalistlaridan iborat delegatsiyasiga Ankorijga borish uchun kamida uchta samolyot kerak bo‘lgan.
NBC hisob-kitoblariga ko‘ra, faqat bitta “Rossiya” samolyotini yoqilg‘i bilan to‘ldirish bir gallon aviakerosin narxini hisobga olgan holda taxminan 85 ming dollarga tushishi mumkin. Putin delegatsiyasi uchun odatda jami uchta samolyot ishlatiladi.
“Putinning samolyoti 152 620 litr sig‘imga ega. Xalqaro havo transporti assotsiatsiyasi (IATA) Jet Fuel Price Monitor ma’lumotlariga ko‘ra, so‘nggi paytlarda bir gallon aviayonilg‘i (taxminan 3,8 litr) narxi 2,10 AQSH dollari atrofida bo‘lgan. Demak, bitta samolyot uchun Rossiya taxminan 85 ming dollar to‘lagan bo‘lishi mumkin”, deya ta’kidlaydi Amerika telekanali.
Izoh (0)