O‘zbekistonda bog‘chalar hududidagi 4 ta yer uchastkasi ruxsatsiz berib yuborilgani aniqlandi

AOKAda Maktabgacha ta’lim vazirligi boshqarma boshlig‘i Oybek Turdiyev ishtirokida o‘tkazilgan brifingda bolalar bog‘chalaridagi korrupsiya holatlari haqida ma’lumot berildi.

Qayd etilishicha, Xorazm viloyati Xonqa tumanidagi 43-son davlat maktabgacha ta’lim tashkiloti xodimi fuqaroga Urganch shahridagi davlat maktabgacha ta’lim tashkilotlarining biriga ishga kiritib qo‘yishni va’da qilgan. Tamagirlik yo‘li bilan 2 million so‘m olayotgan vaqtida daliliy ashyo bilan qo‘lga olingan. Unga nisbatan jinoyat ishi qo‘zg‘atilib, dastlabki tergov harakatlari olib borilmoqda.

2022-yil aprel oyida Xorazm viloyati MTB va viloyat DXX boshqarmasi xodimlari hamkorlikda tadbir o‘tkazgan. Natijada viloyat MTB mas’ul xodimi xizmat mavqeyidan foydalanib oilaviy nodavlat maktabgacha ta’lim tashkiloti rahbarlarining har biridan 1 million so‘mdan pul mablag‘larini firibgarlik yo‘li bilan qo‘lga kiritgani aniqlangan. Unga nisbatan Jinoyat kodeksining 168-moddasi (firibgarlik) 3-qismi “v” bandi va 25, 168-moddasi 3-qismi “b, v” bandlari bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.

Shuningdek, Toshkent shahar Olmazor tumani maktabgacha ta’lim bo‘limida 50,1 million so‘m budjet mablag‘lari rastrata qilish yo‘li bilan talon-toroj qilingani aniqlangan. Holat yuzasidan tegishli shaxslarga jinoyat ishi qo‘zg‘atilgan.

Prezident qarori talablariga zid ravishda 4 ta holatda vazirlik ruxsatisiz davlat maktabgacha ta’lim tashkiloti hududidagi yer uchastkalari berib yuborilgani holatlari aniqlangan. To‘plangan hujjatlar qonuniy chora ko‘rish uchun Bosh prokuraturaga taqdim etilgan.