Ўзбекистонда боғчалар ҳудудидаги 4 та ер участкаси рухсатсиз бериб юборилгани аниқланди

АОКАда Мактабгача таълим вазирлиги бошқарма бошлиғи Ойбек Турдиев иштирокида ўтказилган брифингда болалар боғчаларидаги коррупция ҳолатлари ҳақида маълумот берилди.

Қайд этилишича, Хоразм вилояти Хонқа туманидаги 43-сон давлат мактабгача таълим ташкилоти ходими фуқарога Урганч шаҳридаги давлат мактабгача таълим ташкилотларининг бирига ишга киритиб қўйишни ваъда қилган. Тамагирлик йўли билан 2 миллион сўм олаётган вақтида далилий ашё билан қўлга олинган. Унга нисбатан жиноят иши қўзғатилиб, дастлабки тергов ҳаракатлари олиб борилмоқда.

2022 йил апрель ойида Хоразм вилояти МТБ ва вилоят ДХХ бошқармаси ходимлари ҳамкорликда тадбир ўтказган. Натижада вилоят МТБ масъул ходими хизмат мавқейидан фойдаланиб оилавий нодавлат мактабгача таълим ташкилоти раҳбарларининг ҳар биридан 1 миллион сўмдан пул маблағларини фирибгарлик йўли билан қўлга киритгани аниқланган. Унга нисбатан Жиноят кодексининг 168-моддаси (фирибгарлик) 3-қисми «в» банди ва 25, 168-моддаси 3-қисми «б, в» бандлари билан жиноят иши қўзғатилган. Ҳозирда дастлабки тергов ҳаракатлари олиб борилмоқда.

Шунингдек, Тошкент шаҳар Олмазор тумани мактабгача таълим бўлимида 50,1 миллион сўм бюджет маблағлари растрата қилиш йўли билан талон-торож қилингани аниқланган. Ҳолат юзасидан тегишли шахсларга жиноят иши қўзғатилган.

Президент қарори талабларига зид равишда 4 та ҳолатда вазирлик рухсатисиз давлат мактабгача таълим ташкилоти ҳудудидаги ер участкалари бериб юборилгани ҳолатлари аниқланган. Тўпланган ҳужжатлар қонуний чора кўриш учун Бош прокуратурага тақдим этилган.