Andijonda 14 ming dollar evaziga tibbiyot institutiga o‘qishga kiritib qo‘yishni va’da qilgan talaba ushlandi

Andijonda 14 ming dollar evaziga o‘qishga kiritib qo‘yishni va’da qilgan shaxs ushlandi, deb xabar beradi Bosh prokuratura huzuridagi departament.

Ma’lum qilinishicha, departament hamda DXXning Ulug‘nor tumani bo‘limlari tomonidan tezkor tadbir o‘tkazilgan. Tadbirda Andijon davlat tibbiyot instituti talabasi A.Q. fuqaro M.ni tanishlari yordamida ushbu institutiga 14 ming dollar evaziga o‘qishga kiritib qo‘yishni va’da qilgani aniqlangan. U kelishilgan puldan 7 ming dollarni olgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Qashqadaryoda ikki kishini o‘qishga kiritib qo‘yish uchun 10 ming dollar pora olgan shaxs qo‘lga tushgani, Farg‘onada Toshkent tibbiyot akademiyasiga o‘qishga kiritib qo‘yish uchun 10 ming dollar olgan shaxs ushlangani to‘g‘risida xabar berilgandi.