Britaniya OAVlarining Rossiyada yaqin orada yalpi safarbarlik e’lon qilinishi haqidagi ma’lumotlari soxta ekanini Rossiya prezidenti matbuot kotibi Dmitriy Peskov ma’lum qildi, deb yozadi “RBK”.
“Bu g‘irt feyk xabarlar”, — deya ta’kidladi u.
Avvalroq Rossiyada ommaviy safarbarlik e’lon qilinishi rejalashtirilayotgani haqida The Guardian, Independent va Daily Record g‘arblik rasmiy shaxslardan iborat manbalariga tayanib xabar bergandi. Nashrlar suhbatdoshlariga ko‘ra, bu haqda “hademay” e’lon qilinadi.
Kreml tez orada safarbarlikni e’lon qilishi haqidagi bunday taxminlarni iyun o‘rtalarida Bloomberg agentligi ham yuqori mansabli yevropalik amaldorlarga tayanib keltirib o‘tgan edi. Ularning ta’kidlashicha, bu qaror Kreml uchun nomaqbul, chunki rossiyaliklar orasida shubhalar uyg‘otishi mumkin. Peskov bu ma’lumotni yolg‘on deb atagandi.
Rejalashtirilayotgan safarbarlik haqidagi ma’lumotlar chet el OAVlarida 9-may arafasida ham rasmiy shaxslarga tayangan holda paydo bo‘lgandi. Xususan, CNN Putinning Ukrainada rasman urush e’lon qilish niyati haqida yozgan, bu esa Rossiyaga “zaxiralarni to‘liq safarbar qilish” imkonini berishi kerak edi. Telekanal, shuningdek, Britaniya mudofaa vaziri Ben Uollesning LBC efiridagi bayonotini ham keltirgandi: u Rossiya tez orada safarbarlikni e’lon qilib, Ukrainadagi voqealarni ifodalashda “maxsus operatsiya” atamasidan voz kechishini taxmin qilgandi. Shu bilan birga, Uolles unda tegishli ma’lumot yo‘qligini aytgan.
Peskov o‘shanda bu bayonotlarni rad etib, ularni safsata deb atagandi. 9-may kuni urush e’lon qilish ehtimoli qanaqa degan savolga javoban: “Hech qanaqa”, — degan edi.
Eslatib o‘tamiz, “Donetsk Xalq Respublikasi”ning rossiyaparast jangchilari sobiq boshchisi, Rossiya Federal xavfsizlik xizmati sobiq ofitseri Igor Strelkov Moskvadan o‘zbekistonlik va tojikistonliklarni safarbar qilishni taklif etdi. Ularni Moskvadan safarbar qilib, Donbassda ko‘priklar va mudofaa inshootlari qurishga jalb qilish kerak, degan fikrni bildirdi u.
Izoh (0)