Rossiya parlamentining quyi palatasi Rossiya kompaniyalariga tovarlarni mualliflik huquqi egasining ruxsatisiz import qilish imkonini beruvchi qonunni qabul qildi, deb yozadi Meduza.
Tegishli qonun loyihasi Rossiya hukumati tomonidan tayyorlangan edi. 21-iyun kuni Davlat dumasi uni ikkinchi va uchinchi o‘qishlarda darhol qabul qildi.
Davlat dumasi tomonidan ma’qullangan hujjat “intellektual faoliyatning tovarlarda ifodalangan natijalaridan va bunday tovarlar markirovka qilingan individuallashtirish vositalaridan foydalanish qonunni buzish hisoblanmasligi”ni ko‘zda tutadi.
Shu tariqa, parallel import — mamlakatga mualliflik huquqi egasi yoki ishlab chiqaruvchining ruxsatisiz tovarlar olib kirish qonuniylashtirildi. Qonun amal qilishi faqat Rossiya Sanoat va savdo vazirligi tomonidan may boshida tasdiqlangan tovarlarning muayyan toifalariga tegishli bo‘ladi. Ushbu ro‘yxatga ba’zi brendlar (masalan, Bentley, Apple, Siemens, Dyson), shuningdek, tovarlar toifalari (masalan, temiryo‘l lokomotivlari, qayiqlar, ko‘chatlar va gullar) kirdi.
Rossiya Ukrainaga bostirib kirganidan keyin yuzlab chet el kompaniyalari Rossiyada o‘z faoliyatini to‘xtatib turishi yoki mamlakatdan butunlay ketishi haqida e’lon qildi. Mart oxirida Rossiya hukumati o‘z qarori bilan parallel importga ruxsat berdi, ammo tegishli qonun kuchga kirmagunicha, Rossiya kompaniyalari kontrafakt mahsulotlar olib kirgani uchun javobgarlikka tortilishi mumkin.
Izoh (0)