“Donetsk Xalq Respublikasi”ning rossiyaparast jangchilari sobiq boshchisi, Rossiya Federal xavfsizlik xizmati sobiq ofitseri Igor Strelkov Moskvadan o‘zbekistonlik va tojikistonliklarni safarbar qilishni taklif etdi. Bu haqda Ateo Breaking Telegram-kanali xabar bermoqda.
Ularni Moskvadan safarbar qilib, Donbassda ko‘priklar va mudofaa inshootlari qurishga jalb qilish kerak, degan fikrni bildirdi u.
Ta’kidlash joiz, so‘nggi bir necha oylardan buyon Strelkov Moskvani Rossiyada umumiy safarbarlik e’lon qilishga da’vat etib kelmoqda. Ammo yaqinda u o‘z qarashlarini o‘zgartirib, qurolli kuchlarga ommaviy chaqiriq maxsus operatsiyani muvaffaqiyatsizlikdan saqlab qola olmaydi, degan xulosaga kelganini aytgandi.
Rossiya 24-fevraldan beri Ukrainada “harbiy maxsus operatsiya” o‘tkazmoqda. Rossiya prezidenti Vladimir Putin buni Donbass aholisini “genotsid” dan himoya qilish, shuningdek, qo‘shni davlatni “demilitarizatsiya va denasifikatsiya qilish” zarurati bilan izohlagan. Shu bilan birga, u Moskvaning Ukraina hududlarini bosib olish rejasi yo‘qligini ta’kidlagan. Bosqin boshlanganidan keyin Ukraina Rossiya bilan diplomatik aloqalarini uzdi, mamlakatda harbiy holat va safarbarlik e’lon qildi.
Kreml “maxsus operatsiyasi”ning maqsadlari qatorida Donetsk va Lugansk xalq respublikalarini “qutqarish”ni sanagan. Prezident matbuot kotibi Dmitriy Peskov Ukrainada “millatchilik g‘oyalari namoyon bo‘lishini” taqiqlashga erishish niyati haqida gapirgan. Aprel oyi boshida u Rossiya operatsiyaning tezroq yakunlanishiga umid qilayotganini aytgandi.
Ammo 24-may kuni Xavfsizlik kengashi kotibi Nikolay Patrushev Rossiya Ukrainadagi harbiy amaliyot topshiriqlarini bajarishda “muddat ortidan quvmayotganini” aytdi. “Natsizmni yo 100 foiz yo‘q qilish kerak, yoki u bir necha yil ichida yanada xunuk shaklda tiklanadi”, — dedi u. Tashqi ishlar vaziri Sergey Lavrov “maxsus operatsiya”ning maqsadlariga erishilganda jangovar harakatlar tugashini bir necha bor aytgan.
May oxirida esa Rossiya Mudofaa vazirligi rahbari Sergey Shoygu Rossiya qo‘shinlarining Ukrainaga hujumi tinch aholining evakuatsiyasiga imkon berish uchun ataylab sekin olib borilayotganini ma’lum qildi.
Izoh (0)