Британия ОАВларининг Россияда яқин орада ялпи сафарбарлик эълон қилиниши ҳақидаги маълумотлари сохта эканини Россия президенти матбуот котиби Дмитрий Песков маълум қилди, деб ёзади «РБК».
«Бу ғирт фейк хабарлар», — дея таъкидлади у.
Аввалроқ Россияда оммавий сафарбарлик эълон қилиниши режалаштирилаётгани ҳақида The Guardian, Independent ва Daily Record ғарблик расмий шахслардан иборат манбаларига таяниб хабар берганди. Нашрлар суҳбатдошларига кўра, бу ҳақда «ҳадемай» эълон қилинади.
Кремль тез орада сафарбарликни эълон қилиши ҳақидаги бундай тахминларни июнь ўрталарида Bloomberg агентлиги ҳам юқори мансабли европалик амалдорларга таяниб келтириб ўтган эди. Уларнинг таъкидлашича, бу қарор Кремль учун номақбул, чунки россияликлар орасида шубҳалар уйғотиши мумкин. Песков бу маълумотни ёлғон деб атаганди.
Режалаштирилаётган сафарбарлик ҳақидаги маълумотлар чет эл ОАВларида 9 май арафасида ҳам расмий шахсларга таянган ҳолда пайдо бўлганди. Хусусан, CNN Путиннинг Украинада расман уруш эълон қилиш нияти ҳақида ёзган, бу эса Россияга «захираларни тўлиқ сафарбар қилиш» имконини бериши керак эди. Телеканал, шунингдек, Британия мудофаа вазири Бен Уоллеснинг LBC эфиридаги баёнотини ҳам келтирганди: у Россия тез орада сафарбарликни эълон қилиб, Украинадаги воқеаларни ифодалашда «махсус операция» атамасидан воз кечишини тахмин қилганди. Шу билан бирга, Уоллес унда тегишли маълумот йўқлигини айтган.
Песков ўшанда бу баёнотларни рад этиб, уларни сафсата деб атаганди. 9 май куни уруш эълон қилиш эҳтимоли қанақа деган саволга жавобан: «Ҳеч қанақа», — деган эди.
Эслатиб ўтамиз, «Донецк Халқ Республикаси»нинг россияпараст жангчилари собиқ бошчиси, Россия Федерал хавфсизлик хизмати собиқ офицери Игорь Стрелков Москвадан ўзбекистонлик ва тожикистонликларни сафарбар қилишни таклиф этди. Уларни Москвадан сафарбар қилиб, Донбассда кўприклар ва мудофаа иншоотлари қуришга жалб қилиш керак, деган фикрни билдирди у.
Изоҳ (0)