Janubiy Koreya shifokorlari maymunchechak bilan kasallanish bo‘yicha ikki ehtimoliy holatni aniqladi. Bu haqda Kasalliklarni nazorat qilish va oldini olish milliy agentligiga tayanib, Yonhap xabar berdi.
Bemorlarning birinchisi mamlakatga xalqaro aeroport orqali kelgan. Hozirda u Seul g‘arbidagi Inchxon shahri tibbiyot markazida izolyatsiya qilingan. Ikkinchi bemor haqida batafsil ma’lumot berilmagan.
Jahon sog‘liqni saqlash tashkiloti maymunchechak epidemiyasi global salomatlikka xavf tug‘diradimi yoki yo‘qligini baholash uchun 23-iyun kuni favqulodda yig‘ilish chaqiradi. JSST bugunga qadar 39 mamlakatda maymunchechak bilan kasallanish bo‘yicha 1600 dan ortiq tasdiqlangan va 1500 ga yaqin shubhali holatlarni qayd etgan.
Iyun o‘rtalarida ushbu kasallik Gruziyada ham aniqlangan edi. Portugaliyada maymunchechak bilan kasallanganlar soni 150 dan oshgan.
Hozirda JSST maymunchechak nomini o‘zgartirish ustida ishlamoqda. Qayd etilishicha, kasallikning nomi tashkilot tavsiyalariga mos kelmaydi, tavsiyalarga ko‘ra, nomlashda hududlar va hayvonlar nomini ishlatmagan yaxshiroq.
Maymunchechak kam uchraydigan yuqumli kasallik bo‘lib, Markaziy va G‘arbiy Afrikaning chekka hududlarida keng tarqalgan. Uning belgilari — ko‘ngil aynishi, isitma, toshma, qichishish va mushak og‘rig‘i. Mintaqadan tashqaridagi holatlar ko‘pincha epidemiologik jihatdan noqulay hududlarga sayohat qilish bilan bog‘liq. Virus kontakt orqali yuqadi, ammo uning tarqalish xususiyati past.
Izoh (0)