Жанубий Корея шифокорлари маймунчечак билан касалланиш бўйича икки эҳтимолий ҳолатни аниқлади. Бу ҳақда Касалликларни назорат қилиш ва олдини олиш миллий агентлигига таяниб, Yonhap хабар берди.
Беморларнинг биринчиси мамлакатга халқаро аэропорт орқали келган. Ҳозирда у Сеул ғарбидаги Инчхон шаҳри тиббиёт марказида изоляция қилинган. Иккинчи бемор ҳақида батафсил маълумот берилмаган.
Жаҳон соғлиқни сақлаш ташкилоти маймунчечак эпидемияси глобал саломатликка хавф туғдирадими ёки йўқлигини баҳолаш учун 23 июнь куни фавқулодда йиғилиш чақиради. ЖССТ бугунга қадар 39 мамлакатда маймунчечак билан касалланиш бўйича 1600 дан ортиқ тасдиқланган ва 1500 га яқин шубҳали ҳолатларни қайд этган.
Июнь ўрталарида ушбу касаллик Грузияда ҳам аниқланган эди. Португалияда маймунчечак билан касалланганлар сони 150 дан ошган.
Ҳозирда ЖССТ маймунчечак номини ўзгартириш устида ишламоқда. Қайд этилишича, касалликнинг номи ташкилот тавсияларига мос келмайди, тавсияларга кўра, номлашда ҳудудлар ва ҳайвонлар номини ишлатмаган яхшироқ.
Маймунчечак кам учрайдиган юқумли касаллик бўлиб, Марказий ва Ғарбий Африканинг чекка ҳудудларида кенг тарқалган. Унинг белгилари — кўнгил айниши, иситма, тошма, қичишиш ва мушак оғриғи. Минтақадан ташқаридаги ҳолатлар кўпинча эпидемиологик жиҳатдан ноқулай ҳудудларга саёҳат қилиш билан боғлиқ. Вирус контакт орқали юқади, аммо унинг тарқалиш хусусияти паст.
Изоҳ (0)