Jahon sog‘liqni saqlash tashkiloti (JSST) butun dunyo mutaxassislari bilan birga maymunchechak virusi (monkey pox), uning tarmoqlari va u keltirib chiqaradigan kasallikning nomini o‘zgartirish ustida ishlamoqda. Bu haqda JSST bosh direktori Tedros Adxanom Gebreyesus matbuot anjumanida ma’lum qildi.
JSST aniqlik kiritishicha, kasallikning nomi tashkilot tavsiyalariga mos kelmaydi, tavsiyalarga ko‘ra, nomlashda hududlar va hayvonlar nomini ishlatmagan yaxshiroq.
Kasalliklarni nomlashda har qanday “madaniy, ijtimoiy, milliy, mintaqaviy, kasbiy yoki etnik guruhlar”ni ranjitish ehtimolidan qochishi kerak, deya ta’kidladi tashkilot vakili.
Avvalroq bir guruh olimlar maymunchechak kasalligining nomini o‘zgartirish talabi bilan chiqqandi. Ular buni “diskriminatsiya” va ushbu virus Afrika bilan bog‘liq degan qarashlarga “yorliq yopishtirish” deb atagan. Ularning aytishicha, ortib borayotgan dalillar to‘plami virus uzoq vaqt davomida odamdan odamga sezdirmasdan yuqib kelayotganini ko‘rsatmoqda, ammo ommaviy axborot vositalari hozirgi epidemiyani Afrika mamlakatlari bilan bog‘lashga urinishda davom etmoqda. Bundan tashqari, OAV Yevropadagi epidemiya haqidagi maqolalarni muntazam ravishda afrikalik bemorlarning fotosuratlari bilan chop etmoqda.
Maymunchechakning hozirgi epidemiyasi haqida ma’lumot 2022-yil may oyida paydo bo‘lgan. 8-iyun holatiga ko‘ra, maymunchechak odatda keng tarqalmaydigan 28 mamlakatda, avvalo Yevropa va Amerikada 1285 kishida ushbu kasallik tasdiqlangan. Virus keng tarqalgan Afrikada esa yil boshidan buyon 1536 ta kasallanish holati ma’lum bo‘lib, 72 kishi uning oqibatida vafot etgan.
O‘zbekiston Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Nurmat Otabekov 23-may kuni O‘zbekistonda maymunchechak qayd etilmagani haqida aytib o‘tgandi. “Ayni paytda JSST tavsiyalaridan kelib chiqib bu infeksiyaning yurtimizga kirib kelmasligi uchun zarur choralarni ko‘ryapmiz”, — degandi u. Keyinroq u O‘zbekistonga maymunchechak kirib kelishi ehtimoli mavjud, lekin tarqalish xavfi juda pastligini ma’lum qilgandi.
Izoh (0)