«Донецк Халқ Республикаси»нинг россияпараст жангчилари собиқ бошчиси, Россия Федерал хавфсизлик хизмати собиқ офицери Игорь Стрелков Москвадан ўзбекистонлик ва тожикистонликларни сафарбар қилишни таклиф этди. Бу ҳақда Аteo Breaking Telegram-канали хабар бермоқда.
Уларни Москвадан сафарбар қилиб, Донбассда кўприклар ва мудофаа иншоотлари қуришга жалб қилиш керак, деган фикрни билдирди у.
Таъкидлаш жоиз, сўнгги бир неча ойлардан буён Стрелков Москвани Россияда умумий сафарбарлик эълон қилишга даъват этиб келмоқда. Аммо яқинда у ўз қарашларини ўзгартириб, қуролли кучларга оммавий чақириқ махсус операцияни муваффақиятсизликдан сақлаб қола олмайди, деган хулосага келганини айтганди.
Россия 24 февралдан бери Украинада «ҳарбий махсус операция» ўтказмоқда. Россия президенти Владимир Путин буни Донбасс аҳолисини «геноцид» дан ҳимоя қилиш, шунингдек, қўшни давлатни «демилитаризация ва денацификация қилиш» зарурати билан изоҳлаган. Шу билан бирга, у Москванинг Украина ҳудудларини босиб олиш режаси йўқлигини таъкидлаган. Босқин бошланганидан кейин Украина Россия билан дипломатик алоқаларини узди, мамлакатда ҳарбий ҳолат ва сафарбарлик эълон қилди.
Кремль «махсус операцияси»нинг мақсадлари қаторида Донецк ва Луганск халқ республикаларини «қутқариш»ни санаган. Президент матбуот котиби Дмитрий Песков Украинада «миллатчилик ғоялари намоён бўлишини» тақиқлашга эришиш нияти ҳақида гапирган. Апрель ойи бошида у Россия операциянинг тезроқ якунланишига умид қилаётганини айтганди.
Аммо 24 май куни Хавфсизлик кенгаши котиби Николай Патрушев Россия Украинадаги ҳарбий амалиёт топшириқларини бажаришда «муддат ортидан қувмаётганини» айтди. «Нацизмни ё 100 фоиз йўқ қилиш керак, ёки у бир неча йил ичида янада хунук шаклда тикланади», — деди у. Ташқи ишлар вазири Сергей Лавров «махсус операция»нинг мақсадларига эришилганда жанговар ҳаракатлар тугашини бир неча бор айтган.
Май охирида эса Россия Мудофаа вазирлиги раҳбари Сергей Шойгу Россия қўшинларининг Украинага ҳужуми тинч аҳолининг эвакуациясига имкон бериш учун атайлаб секин олиб борилаётганини маълум қилди.
Изоҳ (0)