Беларусь Мудофаа вазирлиги Украина билан чегарадош Гомел вилояти ҳарбий комиссарликлари билан сафарбарлик машғулотлари ўтказилишини эълон қилди.
Бошқарма хабарида таъкидланишича, ўқув машғулотларини ўтказишдан мақсад ҳарбий комиссарликларнинг захирадаги аскарларни сафарбар этиш бўйича вазифаларни бажаришга тайёрлигини текширишдан иборат. Ўқув машғулотлари давомида захирадагилар сафарбарлик тўғрисида хабардор қилинади ва ҳарбий қисмларга жўнатиш пунктларига чақирилади.
Беларусь Мудофаа вазирлиги бундай машғулотлар ҳар йили ўтказилишини, охирги марта Могилев вилоятида ўтказилганини таъкидлади. Аввалги ўқув машғулотларидан фарқли ўлароқ, бу сафар сафарбар этилганлар ҳарбий қисмларга юборилмайди, отрядлар тузилгандан сўнг барча захирадагилар уйларига жўнатилади.
Шунингдек, машғулотларда ҳақиқатга яқин муҳитни яратиш мақсадида махсус операция кучлари бўлинмаларининг иштироки режалаштирилгани хабар қилинган.
Июнь ойи ўрталарида Беларусда «динамик ўзгарувчан муҳит»да вазифаларни бажариш учун логистика бўлинмаларини тайёрлаш бўйича қўмондонлик-штаб машқлари ўтказилган.
Аввалроқ Беларусь Қуролли кучларида кутилмаган текширув бошланган эди, унинг мақсади шахсий таркибнинг кутилмаган инқирозларга жавоб беришга тайёрлигини баҳолаш эди. Мудофаа вазирлигининг хабар беришича, июнь ойи бошида ушбу текширувнинг учинчи босқичи бўлиб ўтди.
Изоҳ (0)