Buyuk Britaniya Ichki ishlar vazirligi tayyorlayotgan tajribaviy loyiha doirasida GPS (Global Positioning System — global joylashuvni aniqlash tizimi) qurilmasi orqali muhojirlarning joylashgan joyini kuzatib borish rejalashtirilmoqda, deb xabar beradi Anadolu Agency.
Britaniya IIVga ko‘ra, tajribaviy dastur doirasida kuzatuv qurilmasi vositasida muhojirlar bilan muntazam kontakt ushlab turiladi, shuningdek, migratsiya markazlari rejimini buzgan shaxslar bo‘yicha ma’lumot yig‘ish amalga oshiriladi.
Yangi mexanizm qoidalarga rioya qilinmagan taqdirda, muhojirlarning ko‘chaga chiqishini yoki ma’lum bir joylarga tashrif buyurishini taqiqlashni, shuningdek, qo‘lga olinishi yoki sud tomonidan ta’qib qilinishini ko‘zda tutadi.
Tajribaviy loyiha ishtirokchilari soni oshkor etilganicha yo‘q.
Nashr qayd etishicha, Buyuk Britaniya bosh vaziri Boris Jonson sinov loyihasini yoqlab chiqib, mexanizmning mamlakatga kirib kelayotgan muhojirlarni nazorat qilish sohasidagi ahamiyatini ta’kidladi.
Bosh vazir fikricha, Buyuk Britaniya mehmondo‘st mamlakat hisoblanadi. “Men bu bilan faxrlanaman, biroq qonunlarni buzib, mamlakatimizga noqonuniy yo‘l bilan kirayotganlarni aytib o‘tish zarur. Bu bizning Ruanda masalasidagi ham siyosatimizdir”, — dedi Jonson.
Bu orada Britaniyaning Qochqinlar masalalari bo‘yicha kengashi ijrochi direktori Enver Solomon hukumatning yangi tashabbusini tanqid qildi.
“Britaniya hukumati urushdan, qirg‘indan va ta’qiblardan qochib kelgan odamlarga jinoyatchi kabi munosabatda bo‘layotgani dahshatli holatdir”, — dedi Solomon.
Izoh (0)