Avstraliya Mudofaa vazirligi Ukrainaga to‘rtta M113AS4 bronetransportyorlari (piyoda askarlarni olib yurish va razvedka uchun belgilangan zirhli avtomashina) yuborilganini ma’lum qildi, deb yozadi “Interfaks”.
“Ushbu to‘rtta bronetransportyor Avstraliya tomonidan taqdim etilgan 14 ta M113AS4 ning dastlabkilaridir”, — deyiladi vazirlik saytidagi relizda.
Unda ta’kidlanishicha, bronetransportyorlar Ukrainaning An-124 transport samolyoti bilan yuborilgan.
Idora xabariga ko‘ra, Avstraliya hukumatining 285 million Avstraliya dollari (taxminan 200 million AQSH dollari) qiymatidagi harbiy yordam paketi Bushmaster himoyalangan mobil transport vositalari, M777 gaubitsalari, tankka qarshi qurollar, o‘q-dorilar, uchuvchisiz uchar qurilmalar va aslaha-anjomlarni o‘z ichiga oladi.
Avstraliya bosh vaziri Entoni Albaneze ma’lum qilishicha, yordamning ushbu partiyasi “Ukraina mudofaa vazirligining qo‘shimcha transport vositalarini taqdim etish haqidagi to‘g‘ridan to‘g‘ri so‘roviga javob bo‘lib, Avstraliyaning Ukraina xalqini qo‘llab-quvvatlashga sodiqligini namoyish etadi”.
Eslatib o‘tamiz, avvalroq Ukraina tashqi ishlar vaziri Dmitriy Kuleba G‘arb mamlakatlari Ukrainaga qurol yetkazib berishni to‘xtatgan taqdirda ham mamlakat harbiylari jang qilishda davom etadi, hatto belkuraklar yordamida kurashishga to‘g‘ri kelsa ham, degan edi.
Qurol-yarog‘ yetkazib berish hozir Ukraina va G‘arb mamlakatlari, xususan, Yevroittifoq davlatlari o‘rtasidagi munosabatlarda eng jiddiy masalalardan biri bo‘lib turibdi. Chunonchi, Kiyev, masalan, Germaniyani og‘ir qurol-yarog‘lar yetkazib bermayotgani uchun tanqid qildi. Berlin, o‘z navbatida, Ukrainani qurollar bilan, shu jumladan, zamonaviy gaubitsalar bilan ta’minlayotganini, ammo Ukrainaning barcha xohishlarini ham qondira olmasligini aytib javob qildi.
Avvalroq Ukraina G‘arb mamlakatlaridan o‘zi so‘ragan harbiy yordamning 10 foizinigina qabul qilgani aytilgandi. “Ukraina qancha ko‘p sa’y-harakatlar qilmasin, armiyamiz qanchalik darajada professional bo‘lmasin, g‘arblik sheriklarimiz ko‘magisiz bu urushda g‘olib bo‘la olmaymiz… Ukraina so‘ragan, bizga kerak bo‘lgan narsalarning taxminan 10 foizini oldik”, — degan edi mamlakat mudofaa vaziri o‘rinbosari Anna Malyar.
Izoh (0)