O‘rmon yong‘inlari sabab Germaniya, Gretsiya va Ispaniya aholisini evakuatsiya qilishga to‘g‘ri keldi, deb yozmoqda Deutsche Welle nashri.
Yoz boshida yuqori harorat va kuchli shamollar Germaniyaning sharqiy yerlariga yetib borgan va Berlinning janubi-g‘arbida yong‘in keltirib chiqargan.
Mamlakat milliy meteorologiya agentligining ma’lum qilishicha, avvaliga Germaniya g‘arbida, so‘ng mamlakat sharqida havo harorati Selsiy bo‘yicha 38 darajadan oshgan. 20 ga yaqin provinsiya aholisini evakuatsiya qilish buyurilgan. Brandenburg shtatidagi Treuenbritzen shahri mahalliy hokimiyat binosi evakuatsiya qilinganlar uchun favqulodda boshpana vazifasini o‘tamoqda.
O‘t o‘chirish bo‘limi vakilining aytishicha, o‘rmon yong‘inlari 100—110 gektarga yaqin maydonni qamrab olgan. Yong‘inni o‘chirishga harbiy vertolyot safarbar etilgan.
Shuningdek, Gretsiyadagi ikkinchi yirik orol Eviya markazida o‘rmon yong‘ini nazoratdan chiqib ketdi. Kuchli shamol tufayli olov Gayadagi tog‘ o‘rmonining yon bag‘irlari bo‘ylab tarqaldi.
Rasmiylar ehtiyot chorasi sifatida Kremastos qishlog‘ini evakuatsiya qilishni buyurdi — u yerda yong‘in ba’zi uylarga 800 metrgacha yaqinlashgan. Yerda 70 ga yaqin o‘t o‘chiruvchi yong‘in bilan kurashgan, ularga 9 ta o‘t o‘chirish samolyoti va 4 ta vertolyot yordam bergan.
Eviya o‘tgan yozda ham dahshatli o‘rmon yong‘inlariga duch kelgan edi — tabiiy ofat oroldagi o‘rmonning uchdan bir qismini yo‘q qilgan.
Ayni paytda, Ispaniyadagi o‘t o‘chiruvchilar, mamlakatda iyun oyi uchun rekord haroratni keltirib chiqargan jazirama to‘lqini oqibatida bir necha kundan beri davom etayotgan o‘rmon yong‘iniga qarshi kurashmoqda. Ispaniyaning ko‘plab shaharlarida termometrlar Selsiy bo‘yicha 40 darajadan oshgan.
Mintaqaviy hokimiyat ma’lumotlariga ko‘ra, eng ko‘p zarar shimoli-g‘arbiy Samora provinsiyasida ko‘rilgan, u yerda 25 ming gektardan ortiq yer yonib ketgan. O‘rmon yong‘inlari Kataloniya shimoli-sharqining uch qismida — Lerida, Tarragona va Barselona janubidagi Garraf tabiiy bog‘ida faol bo‘lgan. Ispaniyalik o‘t o‘chiruvchilar o‘tgan haftada birgina Kataloniyaning o‘zida 200 dan ortiq turli o‘rmon yong‘inlariga duch kelganini aytdi.
Ayni paytda mutaxassislar yuqori harorat iqlim o‘zgarishidagi xavotirli tendensiyalardan kelib chiqqani haqida ogohlantirdi.
“Bugun biz ko‘rayotgan manzara, afsuski, kelajak xabarchisidir”, — dedi Jenevadagi Butunjahon meteorologiya tashkiloti matbuot kotibi Kler Nullis.
Izoh (0)