Австралия Украинага бронетранспортёрлар юборди

Австралия Мудофаа вазирлиги Украинага тўртта М113АS4 бронетранспортёрлари (пиёда аскарларни олиб юриш ва разведка учун белгиланган зирҳли автомашина) юборилганини маълум қилди, деб ёзади «Интерфакс».

«Ушбу тўртта бронетранспортёр Австралия томонидан тақдим этилган 14 та М113АS4 нинг дастлабкиларидир», — дейилади вазирлик сайтидаги релизда.

Унда таъкидланишича, бронетранспортёрлар Украинанинг Ан-124 транспорт самолёти билан юборилган.

Идора хабарига кўра, Австралия ҳукуматининг 285 миллион Австралия доллари (тахминан 200 миллион АҚШ доллари) қийматидаги ҳарбий ёрдам пакети Bushmaster ҳимояланган мобил транспорт воситалари, М777 гаубицалари, танкка қарши қуроллар, ўқ-дорилар, учувчисиз учар қурилмалар ва аслаҳа-анжомларни ўз ичига олади.

Австралия бош вазири Энтони Альбанезе маълум қилишича, ёрдамнинг ушбу партияси «Украина мудофаа вазирлигининг қўшимча транспорт воситаларини тақдим этиш ҳақидаги тўғридан-тўғри сўровига жавоб бўлиб, Австралиянинг Украина халқини қўллаб-қувватлашга содиқлигини намойиш этади».

Эслатиб ўтамиз, аввалроқ Украина ташқи ишлар вазири Дмитрий Кулеба Ғарб мамлакатлари Украинага қурол етказиб беришни тўхтатган тақдирда ҳам мамлакат ҳарбийлари жанг қилишда давом этади, ҳатто белкураклар ёрдамида курашишга тўғри келса ҳам, деган эди.

Қурол-яроғ етказиб бериш ҳозир Украина ва Ғарб мамлакатлари, хусусан, Евроиттифоқ давлатлари ўртасидаги муносабатларда энг жиддий масалалардан бири бўлиб турибди. Чунончи, Киев, масалан, Германияни оғир қурол-яроғлар етказиб бермаётгани учун танқид қилди. Берлин, ўз навбатида, Украинани қуроллар билан, шу жумладан, замонавий гаубицалар билан таъминлаётганини, аммо Украинанинг барча хоҳишларини ҳам қондира олмаслигини айтиб жавоб қилди.

Аввалроқ Украина Ғарб мамлакатларидан ўзи сўраган ҳарбий ёрдамнинг 10 фоизинигина қабул қилгани айтилганди. «Украина қанча кўп саъй-ҳаракатлар қилмасин, армиямиз қанчалик даражада профессионал бўлмасин, ғарблик шерикларимиз кўмагисиз бу урушда ғолиб бўла олмаймиз… Украина сўраган, бизга керак бўлган нарсаларнинг тахминан 10 фоизини олдик», — деган эди мамлакат мудофаа вазири ўринбосари Анна Маляр.