Avstraliya hukumati Rossiya Davlat Dumasining 76 nafar deputati hamda Donetks va Lugansk hukumatlarining 34 nafar a’zosiga qarshi sanksiya qo‘llamoqda. Bu haqda Avstraliya tashqi ishlar vaziri Maris Peynga tayanib, The Sydney Morning Herald xabar berdi.
“Ushbu shaxslar Ukraina hukumatining ruxsatisiz mamlakat hududi ustidan davlat hokimiyatini o‘rnatish orqali Ukraina suvereniteti va hududiy yaxlitligini buzgan”, — dedi u.
Uning qo‘shimcha qilishicha, Avstraliya Tashqi ishlar vazirligi tez orada yangi sanksiyalar ostiga tushgan odamlarning ro‘yxatini taqdim etadi. Rossiyalik deputatlarga qarshi sanksiyalar DXR va LXRning tan olinishini qo‘llab-quvvatlash uchun ovoz berish, shuningdek, ushbu respublikalarga harbiy yordam ko‘rsatish to‘g‘risidagi shartnomani ratifikatsiya qilish ortidan kiritilmoqda.
Sanksiyalar dezinformatorlar va propogandachilar ro‘yxatiga kiritilgan Davlat Dumasi deputati Oleg Matveychevga ham ta’sir qiladi. Matveychev 2018-yilgi prezidentlik saylovlarida Vladimir Putinning saylovoldi shtabi a’zosi bo‘lgan. 2020-yilda u “Rossiya yetakchilari” tanlovining finalchisiga aylandi, 2021-yilda esa “Yagona Rossiya” partiyasidan Davlat Dumasiga saylovda qatnashgan.
Bundan avval, 22-aprel kuni Avstraliya 147 nafar rossiyalikni sanksiyalar ro‘yxatiga kiritgan edi. Rossiya prezidenti Vladimir Putinning qizlari deb taxmin qilinadigan Mariya Vorontsova va Katerina Tixonova, shuningdek, Rossiya tashqi ishlar vazirining qizi Yekaterina Vinokurova sanksiyalar ostiga tushdi. Qolgan 144 kishi Federatsiya Kengashining a’zolaridir.
Avval Avstraliya sanksiyalar ro‘yxatiga Vladimir Putin, tashqi ishlar vaziri Sergey Lavrov va boshqa rossiyalik siyosatchilar hamda biznesmenlarni kiritgan edi. Shuningdek, mamlakat Rossiyaning bir qator kompaniyalariga cheklovlar qo‘llagan va qimmatbaho mahsulotlar, alumina va alyuminiy rudalarini Rossiyaga eksport qilishni taqiqlagan. Sanksiyalar Rossiyaning Ukrainadagi harbiy amaliyotiga javoban joriy etilgan.
Izoh (0)