Katta mablag‘ni o‘zlashtirishda ayblanayotgan Andijon shahri hokimi ushlab turilgan paytda qarorlarga imzo chekkani haqida xabar berilgan edi. Keyinroq uning nomidan hokimlik devonxonasi mudiri hujjatlarni imzolagani ma’lum bo‘lgandi. Andijon shahrining yangi hokimi G‘ofurjon Abdurahmonov qarori bilan sobiq hokimning qator qarorlari bekor qilindi.
“E-qaror” elektron platformasida Bahrom Haydarovning elektron imzosi orqali tasdiqlangan 6 va 7-iyun kunlari qabul qilingan qaror va farmoyishlar joylangandi. Bu vaqtda hokim ushlanib, qamoqqa olingan edi.
Andijon viloyat adliya boshqarmasining bildirishicha, Andijon shahar hokimi Bahrom Haydarov 6-iyun kuni soat 16:50 da jinoyat ishi yuzasidan ushlangan bo‘lib, unga sud ajrimiga ko‘ra 7-iyun kuni qamoqda saqlash ehtiyot chorasini qo‘llanilgan.
6-iyun kuni soat 09:43 va 21:18 oralig‘ida hamda 7-iyun kuni 18:10 va 21:07 oralig‘ida hokimlik devonxonasi mudiri S. Qodirjonov tomonidan hokimga tegishli elektron raqamli imzodan foydalanilgan holda “E-qaror” platformasida 26 ta qaror va farmoyish imzolangan.
G‘ofurjon Abdurahmonovning 18-iyundagi qarori bilan sobiq hokim Bahrom Haydarovning 2022-yil 21-aprel, 17-may, shuningdek, 6—7-iyun kunlari qabul qilgan qarorlari bekor qilingan.
Izoh (0)