Bugun,

  • USD 10940.05
  • RUB 182.26
  • EUR 11121.65

Dastlab gumonlanuvchi tariqasida protsessual tartibda ushlangan Andijon shahri hokimi Bahrom Haydarov 2022-yilning 7-iyun kuni, ya’ni ushlab turilgan paytda ham “E-qaror” elektron tizimi orqali qarorlar qabul qilgan. Bu haqda “Daryo” muxbiri Umidjon Mamarasulov xabar bermoqda.

Aniqlanishicha, 2022-yilning 7-iyun kuni Andijon shahar hokimining “Shaharda tadbirkorlik va shaharsozlik faoliyatini amalga oshirish uchun yer uchastkalarini ajratish bo‘yicha onlayn auksionga yer maydonlarini joylashtirish to‘g‘risida”gi ikkita qarori qabul qilingan. Ikkala qaror ham gumonlanuvchi tariqasida protsessual tartibda ushlangan Andijon shahri hokimi Bahrom Haydarov tomonidan imzolangan.

Qarorlarda Andijon shahri “Bog‘i Eram” mahalla fuqarolar yig‘ini hududida joylashgan ikkita 200 kv/metrdagi bo‘sh yer maydonlarini shahar hokimligi zaxirasida mavjudligi ma’lumot uchun qabul qilinishi hamda Davlat kadastrlar palatasi Andijon viloyat boshqarmasidan mazkur zaxiradagi yer maydonlarini davlat mulki sifatida Andijon shahar hokimligi nomiga davlat ro‘yxatidan o‘tkazib berishi so‘ralishi belgilangan.

Aniqlanishicha, Andijon shahar hokimi Bahrom Haydarov 2022-yilning 6-iyun kuni 21 ta qaror va 4 ta farmoyishni imzolagan. Ularning aksariyatini shaharda tadbirkorlik va shaharsozlik faoliyatini amalga oshirish uchun yer uchastkalarini ajratish bo‘yicha onlayn auksion natijalarini tasdiqlashga oid qarorlarni tashkil qiladi.

Qo‘shimcha qilinishicha, shahar hokimi viloyatda Moliya boshqarmasi boshlig‘i sifatida ish yuritgan paytida sheriklari bilan 48 milliard so‘m budjet mablag‘ini talon-toroj qilgan. Bosh prokuratura tomonidan olib borilayotgan tergov ishi doirasida 37 nafar shaxsga nisbatan ayblov e’lon qilinib, ularning 32 nafari qamoqqa olingan. Ayni kunga qadar yetkazilgan zararning 23 foizi qoplangan.

Avvalroq Bahrom Haydarovning davlat manfaatlariga 1,7 miliard so‘m zarar keltirganlikda ayblanayotgani, uning deputatlik dahlsizligini bekor qilish uchun viloyat prokuraturasiga taqdimnoma kiritilgani xabar qilingan edi. “Daryo” muxbiri bilan suhbatlashgan hokim esa buni inkor etgandi.

Izoh
Asosiy yangiliklar
Dunyo
Qirg‘iziston ta’lim vaziri xorijlik talabalardan pora olayotgan vaqtda ushlandi
Dunyo
Qozog‘iston Rossiyaga harbiy texnika yuborayotgani haqidagi xabarlar yuzasidan mamlakat Mudofaa vazirligi izoh berdi
Mahalliy
O‘zbekistonda 30-sentabrda qanday ob-havo kutilmoqda?