Namangan xalqaro aeroportidan Farg‘ona vodiysi ziyoratchilarining ilk guruhi Haj safariga jo‘nab ketdi. Bu haqda “Daryo” muxbiri Azizbek Abduvaliyev xabar bermoqda.
Namangan viloyati vakillaridan iborat guruh 18-iyun kuni tunda maxsus ajratilgan avtobuslarda aeroport hududiga kirib keldi.
Shu paytning o‘zida ziyoratchilarning yuklari ortilgan yuk mashinalari ham qo‘nalg‘aga yetib keldi. Ziyoratchilarni aeroport xodimlari va mutasaddilar kutib olib, ichkariga kirishlariga ko‘maklashishdi.
Ziyoratchilarga muftiy Nuriddin Xoliqnazarovning “Haj buyuk ibodatdir” nomli kitobi tarqatildi. Haj davomida bajariladigan amallar, rioya etish zarur bo‘lgan qoidalar yana bir bor tushuntirildi.
Ayol ziyoratchilarning ro‘mollarida mamlakat bayrog‘i aks etgan lenta va gulni eslatuvchi shokilalarni ko‘rish mumkin edi. Ular buni O‘zbekiston, xususan, gullar yurti bo‘lgan Namangandan ekanliklarini eslatib turuvchi ramzlar ekanligini izohlashdi.
To parvoz vaqti kelgunicha ziyoratchilarga yeguliklar, shirinliklar va ichimliklar taqdim etildi. OAV vakillari ulardan bafurja intervyular olishga ham ulgurdi.
19-iyun kuni sahar soat 3.55 da Uzbekistan Airways aviakompaniyasining Boeing 767 rusumli havo kemasi bortida 245 nafar yo‘lovchi bilan Saudiya Arabistonining Madina shahriga yo‘l oldi.
Bugun kechki payt Namangan xalqaro aeroportidan farg‘onalik, ertaga, 20-iyun kuni esa andijonlik ziyoratchilar muborak Haj safariga yo‘l olishi ko‘zda tutilgan.
Izoh (0)