Tashqi mehnat migratsiyasi agentligi O‘zbekiston bosh konsulxonasi ko‘magida Germaniyaning HS-Personal kompaniyasi bilan mamlakat fuqarolariga nemis tilini o‘rgatish, keyinchalik ularni nemis kompaniyalariga ishga joylashtirish bo‘yicha kelishuvga erishdi, deb xabar beradi “Dunyo” agentligi.
Bosh konsulxonaning ma’lum qilishicha, so‘nggi yillarda xorijda mehnat qilayotgan fuqarolarga munosabat tubdan o‘zgargan, mehnat muhojirlari bilan muloqot yo‘lga qo‘yilgan, ularning muammolarini o‘rganish va hal etishning yangi tizimi joriy etilgan. Tashqi mehnat migratsiyasi jarayonlarini tartibga solish bo‘yicha Germaniya kompaniyalari bilan O‘zbekiston fuqarolarini ushbu mamlakatda mehnat faoliyatini tashkil etish uchun shartnomalar tuzish va qulay shart-sharoitlar yaratish bo‘yicha tizimli ishlar amalga oshirilmoqda.
Amalga oshirilayotgan ishlar doirasida diplomatik missiya ko‘magida Germaniyaning HS-Personal kompaniyasi delegatsiyasi O‘zbekistonga tashrif buyurib, Bandlik va mehnat munosabatlari vazirligi huzuridagi Tashqi mehnat migratsiyasi agentligida muzokaralar o‘tkazgan.
Natijada nemis tilini o‘rgatish va B1 sertifikatini olganlaridan so‘ng, og‘ir avtomashinalar va yo‘lovchi avtobuslari haydovchiligiga, qariyalar uylariga tibbiyot xodimi sifatida, Germaniyadagi ko‘ngilochar bog‘lar, mehmonxonalar va restoranlarga ishga joylashtirish bo‘yicha kelishuvga erishilgan.
Delegatsiya rahbari Leander Xyuttening so‘zlariga ko‘ra, Germaniya tomoni, shuningdek, Toshkentda nafaqat mehnat migrantlari, balki til o‘rganish istagida bo‘lgan barcha uchun boshlang‘ich A1 dan professional C1 darajasida nemis tilini o‘rgatuvchi markazni ochmoqda. Markaz imtihonlarni qabul qiladi va Yevropa Ittifoqi standartlarida javob beradi Telc sertifikatlarini beradi.
Avvalroq O‘zbekistondan Kanadaga mavsumiy ishchilarni yuborish yo‘lga qo‘yilishi mumkinligi to‘g‘risida xabar berilgandi.
Izoh (0)