Futbol bo‘yicha Osiyo kubogining yarim finalidan o‘rin olgan O‘zbekiston va Yaponiya yoshlar terma jamoalari o‘rtasidagi bahsni tomosha qilish uchun stadion yaqiniga ko‘plab muxlislar yig‘ildi. Muxlislar uchun “Bunyodkor” stadioni tashqarisiga katta ekran o‘rnatildi.
Quyida stadion yaqinidagi holat aks etgan videolavhalarni taqdim etamiz.
Eslatib o‘tamiz, Osiyo Kubogi—2022 1/4 finali doirasidagi Iroqqa qarshi kechgan bahsning birinchi bo‘lim boshida hakamning qarorlari va raqib futbolchilaridan norozi bo‘lgan ayrim muxlislar maydon hamda texnik hudud tomon qattiq buyumlarni uloqtirgandi. Uloqtirilgan jismlar tufayli bir nafar o‘zbekistonlik fotosuratchi va bir nafar xorijlik operator jarohat olgan.OFK Tartib-intizom qo‘mitasi yuzaga kelgan vaziyatlarni o‘rganib chiqib, O‘zbekiston U-23 terma jamoasi futbolchisi Abduvohid Ne’matovga nisbatan 3 ta o‘yinga chetlatish (diskvalifikatsiya) va jarima (500 AQSH dollari) intizom chorasini qo‘llash, Olimpiya terma jamoasining yarim final doirasida Yaponiyaga qarshi uchrashuvini muxlislarsiz o‘tkazish hamda O‘zbekiston futbol assotsiatsiyasiga jarima intizom chorasini qo‘llash yuzasidan qaror chiqardi.
Izoh (0)