Namanganda Jazeera Airways aviakompaniyasi mutasaddilarining viloyatdagi turizm kompaniyalari va agentliklari vakillari bilan uchrashuvi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Namangan xalqaro aeroporti ma’muriyati tashabbusi bilan viloyat turizm va madaniy meros boshqarmasi hamkorligida tashkillangan tadbirda Jazeera Airways aviakompaniyasi tomonidan ko‘rsatilayotgan xizmatlar va amalga oshirilayotgan yo‘nalishlar haqida batafsil ma’lumot berildi.
Jazeera Airways aviakompaniyasi vakili Ildar Abubakirovning ma’lum qilishicha, hozirda Namangan—Kuvayt—Namangan yo‘nalishida doimiy reyslarni yo‘lga qo‘yish masalasi ko‘rib chiqilmoqda.
Ushbu aviareyslarni joriy yil avgust oyidan boshlab haftasiga ikki marotaba amalga oshirish rejalashtirilmoqda. Talab va ehtiyojdan kelib chiqib, ularning soni ko‘paytirilishi yoki aksincha kamaytirilishi mumkin.
“Mazkur yo‘nalish Namangan, umuman, vodiy aholisiga Fors ko‘rfazi davlatlariga sayohat qilish uchun imkoniyat yaratadi. Qolaversa, umra safarini amalga oshirish istagidagi ziyoratchilar uchun ham o‘ziga xos qulayliklar tug‘diradi”, — deydi Ildar Abubakirov.
Ma’lumot uchun, Jazeera Airways Kuvayt milliy aviakompaniyasi bo‘lib, 2004-yildan beri Pokiston, Hindiston, Shri-Lanka, Nepal, Yaqin Sharq va Yevropa davlatlariga parvozlarni amalga oshirib kelmoqda. Jazeera Airways 2021-yili Kuvayt—Toshkent yo‘nalishi bo‘yicha reysni ham yo‘lga qo‘ygandi.
Izoh (0)