Ichki ishlar vazirligi muxlislarni bugun, 15-iyun kuni soat 21:00 da 23 yoshgacha bo‘lgan O‘zbekiston hamda Yaponiya yoshlar terma jamoalari o‘rtasida Osiyo kubogi yarim final uchrashuvi bo‘lib o‘tadigan “Bunyodkor” stadioniga bormaslikka chaqirdi. Bu haqda vazirlik matbuot kotibi Shohrux G‘iyosov xabar qildi.
“OFK tartib-intizom qo‘mitasi O‘zbekiston U23 hamda Iroq U23 jamoalari o‘rtasidagi o‘yinda muxlislar tomonidan sodir etilgan nojo‘ya xatti-harakatlar yuzasidan tegishli qaror qabul qildi.
Unga ko‘ra, O‘zbekiston-Yaponiya o‘rtasidagi yarim final bahsiga o‘zbekistonlik muxlislar stadionga kiritilmaydi. Yaponiyalik muxlislarga esa stadionga kirishga ruxsat beriladi.
Shu o‘rinda yurtdoshlarimizga futbol uchrashuvini tomosha qilish uchun stadionga kelmasdan, oila davrasida telekanallar orqali kuzatib borishlari tavsiya etiladi”, — deyiladi xabarda.
Bundan tashqari, Toshkent shahar Ichki ishlar bosh boshqarmasining xabar qilishicha, 15-iyun kuni Chilonzor tumanining bir qator ko‘chalarida yo‘l ta’mirlash ishlari olib borilayotgani munosabati bilan soat 17:00 dan soat 24:00 gacha bo‘lgan vaqtda avtotransport vositalari uchun harakat vaqtinchalik cheklanadi. Jumladan:
- Muqimiy va Chilonzor ko‘chalari chorrahasidan Chilonzor va KHAY ko‘chalari chorrahasigacha bo‘lgan qismi;
- Muqimiy va Arnasoy ko‘chalari chorrahasidan Cho‘ponota va Arnasoy ko‘chalari chorrahasigacha bo‘lgan qismi;
- Bunyodkor ikkinchi darajali ko‘chasidan Cho‘ponota ko‘chasigacha bo‘lgan qismi.
Shunga qaramay, futbol uchrashuvini tomosha qilish uchun “Bunyodkor” stadioni atrofiga katta monitor o‘rnatilmoqda.
Eslatib o‘tamiz, Osiyo Kubogi—2022 1/4 finali doirasidagi Iroqqa qarshi kechgan bahsning birinchi bo‘lim boshida hakamning qarorlari va raqib futbolchilaridan norozi bo‘lgan ayrim muxlislar maydon hamda texnik hudud tomon qattiq buyumlarni uloqtirgandi. Uloqtirilgan jismlar tufayli bir nafar o‘zbekistonlik fotosuratchi va bir nafar xorijlik operator jarohat olgan.
OFK Tartib-intizom qo‘mitasi yuzaga kelgan vaziyatlarni o‘rganib chiqib, O‘zbekiston U-23 terma jamoasi futbolchisi Abduvohid Ne’matovga nisbatan 3 ta o‘yinga chetlatish (diskvalifikatsiya) va jarima (500 AQSH dollari) intizom chorasini qo‘llash, Olimpiya terma jamoasining yarim final doirasida Yaponiyaga qarshi uchrashuvini muxlislarsiz o‘tkazish hamda O‘zbekiston futbol assotsiatsiyasiga jarima intizom chorasini qo‘llash yuzasidan qaror chiqardi.
Izoh (0)