Temur Kapadze: Yaponiya kuchli raqib, ammo biz g‘alaba uchun maydonga tushamiz

O‘zbekiston U-23 terma jamoasi bosh murabbiyi Timur Kapadze U-23 Osiyo Kubogi—2022 yarim finali oldidan matbuot anjumanida ishtirok etdi.

Yarim final haqida

Albatta yarim finalga chiqqanimizdan xursandmiz. Har bir uchrashuvda qiyinchiliklar bo‘ldi. Lekin muhimi biz keyingi bosqichga chiqa oldik.

Tiklanish haqida

Ham jismoniy, ham ruhiy tomonlama charchashlar bor. Bu o‘yinda ko‘p kuch sarfladik. Biroq tiklanish jarayoni ham reja bo‘yicha ketmoqda. Ertangi o‘yingacha tayyor bo‘lib ulguramiz.

Raqib haqida

Yaponiyani ko‘rib chiqdik, bu jamoa har doim kuchli bo‘lgan, taktik jihatdan ham yaxshi jamoa hisoblanadi. Lekin har bir jamoada o‘ziga yarasha zaif tomonlari bo‘ladi. Biz ham ulardan unumli foydalangan holda g‘alaba qozonamiz deb umid qilamiz.

Yaponiya hujumni yaxshi tashkil etadi. Lekin biz ham g‘alaba uchun maydonga chiqamiz. Bu yo‘lda bor imkoniyatimizni ishga solamiz.

Avvalgi o‘yinlar haqida

Har bir uchrashuvimiz har xil o‘tdi. Raqiblarimizni nozik taraflarini topishga harakat qildik. Ertangi o‘yinda ham o‘z o‘yinimizni namoyish etib, munosib qarshilik ko‘rsatamiz.

Jamoaning ruhiy holati

Ne’matov katta yo‘qotish. Lekin o‘zingiz ko‘rdingiz, chetlatishdan keyin futbolchilar o‘zini yo‘qotib qo‘ymadi. Natija uchun harakat qildik. Shu sababli jamoaning ruhiy holati yaxshi. Futbol aslida shu. Hammamiz bir-birimizni to‘ldirib boramiz. Bizda yaxshi futbolchilar yetarli.

Qo‘shimcha bo‘limlar va penaltiga tayyorgarlik haqida

Har bir vaziyatga tayyorgarlik ko‘ryapmiz. Jismoniy tomondan ham ishlab boryapmiz. Muhimi, futbolchilarimga ishonaman.

Muxlislar

Ishqibozlar bilan futbol albatta boshqacha. Ular bizga katta motivatsiya va qo‘shimcha kuch beryapti. Lekin hamma narsa bo‘lishi mumkin. Har qanday vaziyatga tayyormiz. Muhimi biz yurtimizdamiz va ularni qo‘llab-quvvatlashini his qilib turamiz.

Temur Kapadze, O‘zbekiston U-23 terma jamoasi bosh murabbiyi