Америка расмийлари Вашингтон томонидан Киевга ёрдам учун ажратилган маблағлар устидан зарурий назорат ўрнатилмаса, уларнинг талон-торож қилиниши мумкинлигидан хавотир билдирди. Бу ҳақда The Wall Street Journal (WSJ) хабар берди. Нашрнинг қайд этишича, АҚШ расмийлари Афғонистонда ҳам худди шундай нотўғри ҳисоб-китобга йўл қўйган ва ҳозир оқибатлари ҳақида ўйламасдан яна катта миқдорда маблағ сарфлашда давом этмоқда.
Ҳозиргача Ғарб томонидан кўрсатилган ёрдамдан ноқонуний фойдаланиш ҳолатлари қайд этилмаган. Бироқ, ажратилган ёрдам миқдори ва унинг тақсимланиши қатъий назорат қилинмаётгани ҳисобга олинса, муаммолар, эҳтимол, вақт масаласидир, деб таъкидлайди нашр. «Ёрдамнинг жуда катта кўламда эканини ҳамда Украинада АҚШ ва НАТО назорат органлари йўқлигини инобатга олган ҳолда, АҚШнинг аввалги ҳарбий кампаниялари фахрийлари муаммолар пайдо бўлиши вақт масаласи эканини айтмоқда», — дейилади мақолада.
Пентагоннинг собиқ расмийси Марк Кенсиан Америка ҳукуматининг Украина учун ажратган маблағлари ўзлаштирилиши мумкин, деб ҳисобламоқда. «Киев можаро авж олишидан олдин ҳам коррупция учун танқид қилинган ва бу муаммо кейин ҳам ҳеч қаерга йўқолмаган», — дея тушунтирди Кенсиан.
Ўз навбатида, АҚШ ҳукуматининг Афғонистонни қайта тиклаш бўйича бош инспектори, бир неча йиллардан бери АҚШнинг Афғонистонга ёрдам кўрсатиш жараёнида йўл қўйилган қонунбузарликларни аниқлаш билан шуғулланиб келаётган Жон Сопко ўғирликни муқаррар деб билишини айтди.
«Мақсад эзгу бўлса ҳам, ўғирлик содир бўлади. Қонунбузарликлар бўлади. Непотизм бўлади. Аҳмоқона қарорлар қабул қилинади. Инсон табиати шундай. Бир-икки йил ичида биз исрофгарчилик, ўғирлик ва суиистеъмоллик ҳақидаги янгиликларни ўқиймиз ҳали», – дея қўшимча қилди Жон Сопко.
Май ойида АҚШ Сенати Украинага рекорд даражадаги 40 миллиард доллар ёрдам кўрсатишни маъқуллади. АҚШ Давлат котиби Энтони Блинкен Украинага янги ҳарбий ёрдам пакетининг қиймати 100 миллион доллар бўлишини маълум қилди.
АҚШ Давлат котибининг Европа ва Евросиё масалалари бўйича ёрдамчисининг биринчи ўринбосари Дерек Хоган АҚШ Украина ҳукуматига ойига 1,5 миллиард доллар жўнатишни режалаштираётганини маълум қилди. Унинг сўзларига кўра, Вашингтон 4—5 ойга давомида шундай ёрдамни тақдим этади.
Изоҳ (0)