Хитойдаги ресторанлардан бирида овқатланиб ўтирган аёллар бир гуруҳ эркаклар ҳужумига учради, деб хабар бермоқда Sky News. Воқеа акс этган видео интернетда оммалашиб кетди ва жамоатчиликнинг норозилигига сабаб бўлди.
Кузатув камераларига муҳрланган кадрларда шимолий Хэбей провинциясидаги Ташан шаҳрида жойлашган барбекью ресторанида 10 июнь, жума куни тонгги 2:40 да тўрт аёл овқатланиб ўтирган столга эркаклардан бири яқинлашиб, бир аёлга қўл теккизганини кўриш мумкин. Аёл бир неча марта қаршилик кўрсатган, эркак унга тарсаки туширганидан кейин эса у ҳам уришни бошлаган ва шу тариқа жанжал келиб чиққан.
Шундан кейин бир гуруҳ эркаклар ресторанга кириб, аёл ва у билан бирга ўтирган дугоналарига ҳужум қилган, уларни ерга йиқитиб, тепган ва уларга стул улоқтирган.
Ресторан ташқарисидаги камералардан олинган тасвирларда ҳужум қилган шахслар эркакка мойиллик кўрсатмаган аёлни судраб чиқариб, дўппослаганини, ўткинчилар эса буни томоша қилиб турганини кўриш мумкин.
Юзи шишиб кетган ва қонга беланган ҳолда замбилда ўтирган аёл сурати, шунингдек, кузатув камераси видеотасвирлари интернетда тарқалиб кетди ва фойдаланувчилар ўртасида кенг норозиликка учради.
Ҳукумат баёнотига кўра, 11 июнь, шанба куни тўққиз нафар гумонланувчи ҳибсга олинган.
Аёлларнинг икки нафари ҳаёт учун хавф туғдирмайдиган жароҳатлар олиб, касалхонага тушган. Қолган иккиси енгил шикастланган.
«Демак, уйдан ташқарида овқатланиш ҳозир шунчалик хавфлими, қаерга борсак, ўзимиз билан эркак кишиларни олиб юришимиз керакми? Бу эркакларнинг бандитлардан ҳеч қандай фарқи йўқ», — деб ёзди Weibo фойдаланувчиларидан бири.
Ижтимоий тармоқлар фойдаланувчилари ҳужумни қоралади ва Таншан полициясини гумонланувчиларни ҳибсга олиш жараёни секин кечгани учун танқид қилди, воқеа эса Хитойда аёлларга муносабат масаласини яна кўтарди.
Изоҳ (0)