Туркманистон биринчи марта Россияда ишлаб чиқариладиган Aurus Senat Limousine зирҳли автомобилини сотиб олди, деб ёзади «Хроника Туркменистана». Мамлакат президенти 10 июнь куни Россияга ташрифи чоғида айнан шу машинада ҳаракатланди. Бу ҳақда «ТАСС» Туркманистон ҳукуматига яқин манбасига таяниб хабар берган.
«Ушбу турдаги автомобиль дунёда энг баланд баллистик ҳимоя даражасига эга ва энг хавфсиз транспорт воситаси ҳисобланади», — дейди манба.
2019 йил августида Россия бош вазири Дмитрий Медведев биринчи Каспий иқтисодий форумида қатнашиш учун Туркманбоши шаҳрига ташрифи чоғида президент Гурбангули Бердимуҳамедовга Россиянинг Aurus автомобиллари линейкасини сотган эди.
Ўшанда катта Бердимуҳамедов Россия премиум автомобилларининг бутун линейкасини сотиб олишга тайёрлигини билдирганди.
ОАВлар Бердимуҳамедов автомобилга қизиқиш билдириб, унинг рангига ва радиатор ҳажмига эътибор қаратгани ва машинадан иссиқ иқлимда фойдаланиш имконияти бўлиши кераклигини айтгани ҳақида ёзганди.
«Рангини биламиз, оқ бўлиши керак», — деган эди Медведев табассум билан. «Агар талабнома бериш керак бўлса, берамиз», — деган Туркманистон раҳбари. «Гапларингизнинг ўзини талабнома деб ҳисоблаймиз», — деб жавоб берган Россия бош вазири.
Ўша йилнинг октябрида Aurus автомобиллари харидини президент Гурбангули Бердимуҳамедов Россия президенти Владимир Путин билан унинг Ашхободга ташрифи чоғида муҳокама қилган эди.
«Биз Aurus автомобилига талабнома бердик. Биринчи партияни сотиб олишни истардик», — деган ўшанда Туркманистон раҳбари. Бироқ ўшандан буён олди-сотди ҳақида хабар берилмаган эди.
Изоҳ (0)